Hili Hosi Komunidade Maibé Saláriu Laek

Ami husu atu governu labele halo diskriminasaun ba ami. Ami nia serbisu todan. Ministériu hotu-hotu ami halo hotu sira nia serbisu. Ami iha Díli de’it iha preukupasaun barak satán ami nia kolega sira iha área rural at liu ami karik.

Autoridade lokál (xefi suku no aldeia) hili diretamente hosi komunidade maibé sira laiha saláriu. Sira iha de’it osan insentivu maibé ki’ik liu kompara ho funsionáriu.

Kompara ho funsionáriu, autoridade lokál sira halo serbisu ne’ebé todan tanba lor-loron sira tenki tama sai aldeia hodi rezolve komunidade sira nia problema. Ho insentivu ne’ebé ki’ik, labele rezolve ekonomia família. Tan ne’e, xefi suku balun dehan governu halo deskriminasaun ba sira.

Xefi Suku Mascarenhas, Posto Administrativu Na’in Feto, Munisípiu Díli, Martinho de Jesus foin lalais ne’e iha Sede Suku Mascarenhas hateten governu labele halo diskriminasaun ba sira tanba ladun iha tratamentu ne’ebé dignu ba xefi suku sira.

“Ami husu atu governu labele halo diskriminasaun ba ami. Ami nia serbisu todan. Ministériu hotu-hotu ami halo hotu sira nia serbisu. Ami iha Díli de’it iha preukupasaun barak satán ami nia kolega sira iha área rural at liu ami karik,” Martinho dehan.

Kada fulan xefi suku sira hetan insentivu 145 dólares, xefi aldeia 120 doleres no xefi juventude 45 dólares. Xefi suku ne’e esplika ho insentivu ida ne’e la sufisiente ba sira nia nesesidade tanba ne’e dalaruma sira labele halo atividade ruma tanba laiha finansiamentu ne’ebé natón.

Nia dehan eleisaun direta maka Xefi Suku no Prezidente Repúblika. Ida ka’er iha leten ás ba (Prezidente), ida seluk kaer iha baze hamutuk ho povu (Xefi Suku) maibé tratamentu estadu nian hatudu katak prezidente moris di’ak duni maibé lider komunitáriu hakdasak hela.

Maske nune’e, Xefi Suku Marcarenhas ne’e hatete insentivu ne’ebé estadu oferese ne’e ki’ik tebes maibé nunka hamte sira nia espíritu atu serbi ba sira nia komunidade ne’ebé fó ona konfiansa tomak ba sira atu kaer ukun durante tinan 5.

“Sira (órgaun soberanu) inus metin de’it Hospitál Nasionál Guido Valadares (HNGV) sira la ba ida. Sira tenke sai ba liur hanesan Korea, Filipina, Thailándia. Ami mós serbisu ba Governu, ami moras, dezastre, ami preukupa tebes ba ami nia saúde maske la ba tratamentu iha liur maibé ami la’o nafatin,” Martinho haktuir.

Hatán kona-ba mandatu ramata ona maibé governu estende tan, xefi suku dehan oras ne’e daudaun komunidade sira komesa kestiona ona katak ukun ne’e to’o tinan lima (5) tanba iha ema individuál no mós partidu polítiku balun hakarak ona kandidata án ba xefi suku maibé labele.

Tuir Dekana Fakuldade Siénsias Sosiais Universidade de Díli (UNDIL), Cesaltina Angela Soares hatete insentivu ne’ebé estadu oferese ba xefi suku sira ne’e la’os hanesan diskriminasaun ida, maibé ita tenke apriende no halo análiza ida katak oinsá maka bele fó hikas tratamentu ida di’ak ba autoridade lokál sira.

“Iha alterasaun lei númeru 3/2003 atu hadi’a xefi suku sira nia preukupasaun. Tanba ne’e maka lei ida ne’e seidauk aprova no promulga ne’e maka seidauk koloka sira. Bainhira lei promulga maka sei halo tratamentu sira ho dignu,” Cesaltina esplika.

Deputadu Arão Noe hosi bankada CNRT no Komisaun A trata asuntu Lei hateten, lei eleisaun xefi suku nian lei númeru 4/2009 foin daudaun iha fulan Outubru liu-ba Parlamentu Nasionál (PN) halo alterasaun no prolonga Xefi suku sira daudaun ne’e nia mandatu mai to’o fulan Outubru 2016.

Prolongasaun ne’e halo atu fó tempu ba PN halo aprovasaun ba lei foun ne’ebé Governu aprezenta ba PN.  No daudaun ne’e baixa ona lei refere ba iha Komisaun A hodi halo estudu no análiza atu nune’e prepara ona ajenda ba halo audiénsia hafoin prepara relatóriu pareser ba atu aprova iha jeneralidade.

Nia dehan, tanba lei ne’e iha mudansa barak iha artigu hamutuk 94 ne’ebé la inklui mós saláriu ba xefi suku sira, tanba sira hanesan órgaun ida ne’ebé labele temi saláriu. Saláriu ne’e só ba ema funsionáriu sira ne’ebé serbisu permanente. Iha ne’e temi subsídiu ba sira nia kargu. Ne’ebe, Governu maka aprova hamutuk $160 ba xefi suku, $120 ba xefi aldeia no mós ba konsellu do suku sira $40 kada fulan.

Vise Prezidente PN, Adriano do Nascimento afirma, lei eleisaun xefi suku ne’e laiha problema, no Komisaun A maka munda duni hodi hein lei sira seluk ne’ebé atu fasilita serbisu suku nian no atu hadi’a di’ak liu-tan.

Tan ne’e, tuir nia, atu hadi’a di’ak liu-tan muda tinan ida de’it laiha problema tanba buat lubun ida maka presiza hadi’a. Nia mós kestiona ho fundus insentivu ne’ebé xefi suku sira simu, no nia rasik mós propoin iha debate atu hasa’e saláriu fiksu ida ba sira (autoridade lokál).

“Foin lalais ami aprova lei ne’e vise Minístru Tomás Cabral mós hateten, maske sira nia saláriu la’os funsionáriu maibé hanesan ho funsionáriu, no hasa’e tan ona ba nível 4,” esplika Adriano.

Nia dehan, sira nia saláriu insentivu tanba sira la’os funsionáriu, maibé nia rasik mós kestiona katak oinsá la tau de’it saláriu ba sira, maibé tanba kestaun funsionalizmu públiku nian. Tuir nia, irarkia estadu nian ne’e hosi prezidente ho xefi suku ne’e xefi suku maka ki’ik liu, maibé hosi governu nian lae. To’o de’it iha nível munisípiu ho postu administrativu de’it.

“Ami mós debate tiha ona kona-ba ida osan natón ne’e. Ha’u rasik halo proposta maibé ha’u lakon. Ha’u hakarak hanesan Indonézia nian. Irarkia  ne’e hosi prezidente mai to’o xefi suku iha parte estrutura governu nian, sira dehan lae to’o de’it munisípiu,” nia haktuir.

Adriano dehan, iha nasaun barak ne’ebé modernu ne’e xefi suku laiha. Para de’it iha munisípiu. No ita iha xefi suku ne’e tanba ita iha tradisaun. “Ami deskuti, definisaun de’it katak, parte governu nian suku ne’e dehan lasu familiár. Família ida maka halo suku ne’e, maibé ha’u nia interpretasaun lae. Suku ida Timor ne’e liu rai (kerajaan) ida ne’ebé ninia estrutura irarkia ne’e iha kedas iha ne’ebá,” Adriano esplika.

Nia informa katak ema balun interpreta definisaun suku ne’e hanesan família balun maka hasai hanesan lasu familiar, tan ne’e iha lei foun ne’e ema na’in hili án de’it. Maibé, tuir nia, ne’e sistema ukun ne’e iha kedas ona molok Portugés tama, ne’ebé ema ukun malu ne’e iha tiha ona hanesan liurai ho ki’ik-oan sira seluk. (Efrem/Jon)

Matadalan