KONFERENSIA JUVENTUDE FRETILIN, ALKATIRI: EMA BALUN HAKARAK FAHE TIMOR

Sekretariu Jeral partidu FRETILIN, Mari Bin Amude Alkatiri, hateten katak, iha ema balun hakarak fahe Timor ba rua, tanba ne’e, komesa soe propaganda katak, FRETILIN manan iha leste mas ba dezenvolve fali Oecusse.

“Balun hakarak fahe nasaun ne’e ba rua, maibe FRETILIN lakohi, hodi hakuak rai ne’e nafatin hamutuk halo ida deit mak nafatin Timor Leste,”  afirma Alkatiri Alkatiri iha nia diskursu wainhira partisipa iha primeiru kongresu nasional Juventude FRETILIN iha CCD, Domingu (12/6/2016).

Alkatiri friza katak, mehi boot FRETILIN nian maka liberta povu, tanba ne’e, hahuu husi Oecusse ba Timor laran tomak.

 “Agora kondisaun iha ona para atu lao ba oin tanba ami nebe mehi hanesan ne’e fo fiar no konfiansa ba malu,” hateten Mari Alkatiri.

Nia hatutan, servisu iha baze mak hanesan ne’e, ema sempre tun hodi kualia katak, FRETILIN AManan iha parte leste maibe ba halo dezenvolvimentu iha Oecusse, maibe FRETILIN mak nune tanba lakohi deskrimina malu.

Alkatiri mensiona katak, kongresu juventude FRETILIN ne’e  atu bele hili Joventude sira nia lideransa nebe sira koñese atu nune bele tun ba servisu hamutuk ho joven sira hodi FRETILIN bele manan iha 2017.

“Agora se mak eleitu ba sai hanensan komisariu Politiku diresaun nasional para lori FRETILIN nia politika ba to’o iha baze no se mak eleitu nudar membru ba diresaun sentral atu lori politika FRETILIN  nian nune lori transformasaun mai,” hateten Alkatiri.

Iha fatin hanesan Prezidente Partidu FRETILIN, Francisco Guteres Lu-OLo hatete, joventude FRETILIN marka dala ida tan iha nia istoria tanba ukun a’an tinan 14 ona foin primera Joventudu halibur a’an iha ne’e.

Lu-Olo mos husu ba joventude sira atu nafatin hamutuk ho partidu FRETILIN hodi materialize norma sira liu liu artigu 92 estatutu partidu nian, hodi kontinua halo reflesaun no esforsu hodi hamutuk, eduka no mobiliza joven Timor oan hotu-hotu atu halo funsaun principal Fretilin nian hanesan organiza mobiliza, eduka, respeitu no dezenvolve sosiedade nebe justu, hamonioza, progresu no paz.

“Jovens sira iha ita bot sira nia kabas misaun nebe todan tebes, iha politika, Istoria no moral ejije ba imi hotu atu iha responsabilidade ida nebe bot hodi hanoin tuir Saudozu sira nian, atu servisu, hakas a’an liu tan, matan kroat liu tan no fiar a’an atu lori mehi sira nebe iha ona hodi servi povu sira,” hateten Lu-Olo.

Lu-Olo rekonhese katak, FRETILIN liberta ona nasaun, maibe seidauk liberta povu. Maske, dalan liberta povu ne’e la’os fasil no tenke liu husi aitarak nia meik tanba ne’e tenke servisu makas hodi nune bele liberta duni povu maubere iha futuru.

“Ita tenke nafatin servisu makas hodi nune liberta ita nia povu maubere, tanba ne’e mak hanesan dezafiu joventude Fretilin Timor leste nian,” afirma Lu-Olo. nes

Jornal Nacional