DILI,
(ANTIL) – Sekretáriu Estadu Juventude no Desportu, Leovigildo Hornai
hateten Liga Futeból sira iha mundu ne’e la’ós finansia hosi governu maibé
finansia hosi patrosinadór sira.
Liga
iha Timor hetan subsídiu hosi governu tanba foin inísia, maibé subsídiu ne’e la
signifika tenke permanense, tempu ida sei para kuandu hetan ona patrosinadór.
“Ita
haree iha rai seluk, Liga no klubu sira la’o tanba hetan sponsorship, tan
ne’e, agora dadauk ita bele ajuda hadi’a no apoiu maibé ki’ik-oan, importante
maka ita hatúr polítika jestaun no sistema Liga no klubu ne’e di’ak para sira
sustentável,” dehan ba jornalista sira iha nia kna’ar fatin, Sional Lecidere,
Tersa (4/10), relasiona ho preokupasaun hosi klubu balun katak subsísiu hosi
governu ba Liga Futeból Amadora ne’e ki’ik liu.
Hanesan
mós Liga sira seluk ne’ebé iha hanesan Liga Basketból no Voliból, Leovigildo
esklarese, governu kontinua apoiu Liga Futeból Amadora époka 2016-2017.
Maske
nune’e, problema fundamentál ne’e la’ós osan maibé tenki eduka malu hodi hasai
hosi pensamentu katak osan maka sai hanesan solusaun hodi rezolve buat
hotu-hotu.
“Problema
fundamentál ne’e problema jestaun tanba ne’e, organizasaun hotu-hotu tenki halo
transparánsia no akuntabilidade, bo’a governasaun iha klubu sira no
organizasaun hotu-hotu ne’e importante”, nia esplika. (jornalista: Xisto
Freitas; editora: Rita Almeida)
Foto:
Sekretáriu Estadu Juventude no Desportu, Leovigildo Hornai.
Sem comentários:
Enviar um comentário