DILI,
(ANTIL) – Komisaun Liga Futeból Amadora sei loke hikas janela
transferénsia jogadór iha tempu badak nia laran. Desizaun ida ne´e LFA foti atu
bele fasilita jogadór sira atu muda hosi klubu ida ba klubu seluk relasiona ho
LFA époka 2016-2017 ne´ebé atu realiza iha tinan ida ne’e.
“Janela
transferénsia jogadór ne’e iha prosesu nia laran, sei prepara hela regulamentu
balun tanba, esperiénsia hatudu ona iha primeiru transferénsia jogadór iha
époka kotuk iha situasaun balun ne’ebé difisil oituan atu rezolve”, Prezidente
LFA, Nilton Gusmão dehan ba jornalista sira iha edifísiu Sekretaria Estadu
Juventude no Desportu, Sionál Lecidere, Tersa, (4/10).
Hafoin
kompleta dokumentu, sei publika ba públiku iha tempu badak para bele hahú halo
transferénsia jogadór. Nilton husu atu klubu sira kontinua komunika malu ho
di’ak no evita dezintendentu entre klubu sira iha janela transferénsia ne’e.
“Jogadór
sira ne’e ita hotu-hotu nian maibé labele kria dezintendentu ba malu,”
Prezidente LF ne´e sujere hafoin ramata sorumutu ho Sekretáriu Estadu Juventude
no Desportu, Leovigildo Hornai, hodi ko’alia kona-ba preparasaun Super Tasa no
LFA époka 2016-2017. (jornalista: Xisto Freitas; editora: Rita Almeida)
Foto:
Prezidente LFA, Nilton Gusmão.
Sem comentários:
Enviar um comentário