Selesaun Nasionál TL Kompete iha Kualifikasaun AFC no Tasa Suzuki

DILI, (ANTIL) – Ekipa Selesaun Nasionál Timor-Leste (TL) Seniór sei partisipa iha jogu rua maka hanesan Kualifikasaun Assocation Football Confederation (AFC) ne’ebé sei hasoru Xina Taipe iha Xina Taipe, 14 Outubru 2016 no Kualifikasaun Tasa Suzuki ne’ebé TL sei sei hasoru Brunei Darussalam iha 18 Outubru.

Ekipa Timor-Leste sei aranka iha semana ida ne’e nia laran. Treinadór Selesaun Nasionál Seniór hosi Brazíl, Fábio Maciel hateten jogu rua ne’e importante tebes tanba ne’e agora sira halo preparasaun ne’ebé di’ak.

Tuir nia katak jogadór selesaun nasionál mesak kualidade di’ak tanba, jogadór hirak ne’e produtu hosi Liga Futeból Amadora ne’ebé ramata ona iha fulan kotuk.

“Futeból iha Timor ne’e kada époka kria kompetisaun futeból interna. Ida ne’e importante tebes, presiza mellora de’it buat balun maibé kondisaun maioria Federasaun Futeból Timor-Leste (FFTL) prepara ona,” Fábio informa ba ANTIL iha Kampu Demokrasia, Bairos dos Grilhos, Segunda, (3/10).

Nia esplika katak jogadór hamutuk 23 maka involve iha selesaun nasionál seniór refere (baliza 3 no jogadór 20). Fábio iha esperansa katak sira sei hetan rezultadu pozitivu iha jogu refere tanba selesaun nasionál Timor preparadu.

“Ami halo preparasaun kle’ur ona,” nia haktuir.

Nu’udar treinadór, nia afirma, sempre orienta jogadór sira atu joga ekipa duké individu maske jogadór bele mellor maibé la ho ekipa sei la-halo buat ida. (jornalista: Xisto Freitas; editora: Rita Almeida)

Foto: Treinadór Selesaun Nasionál Seniór, Fábio Maciel.