DILI,
(ANTIL) – Prezidente Liga Futeból Amadora (LFA), Nilton Gusmão promete,
jogu Super Tasa sei realiza iha Novembru tinan ida ne’e. Klubu vensedór Tasa 12
Novembru 2016, AS Ponta Leste sei hasoru vensedór LFA époka 2015-2016, AD SLB
Laulara iha Super Tasa.
Tan
ne’e, Nilton husu ba SEJD atu dudu oituan empreza sira ne’ebé halo
rekonstrusaun ba Estádiu Baucau no Maliana para halais prosesu ida ne’e para
dezloka atividade refere ba munisípiu.
“Objetivu
prinsipál no objetivu boot liu hosi polítika Sekretaria Estadu Juventude no
Desportu (SEJD) nian katak atividade ne’e lori ba distritu para anima ita nia
sosiedade iha munisípiu,” dehan nia ba jornalista sira iha edifísiu SEJD,
Sionál Lecidere, Dili, Tersa (04/10), hafoin ramata sorumutu ho Sekretáriu
Estadu Juventude no Desportu, Leovigildo Hornai.
Fulan
ida ne’e ramata maka estádiu rua ne’e ida ne’ebé maka termina uluk, estádiu ida
ne’e maka sei utiliza ba Super Tasa.
Iha
fatin hanesan, Sekretáriu Estadu Juventude no Desportu, Leovigildo Hornai
hateten iha semana ida ne’e nia laran sira sei halo fiskalizasaun ba
rekonstrusaun Estádiu Baucau no Maliana ho objetivu atu haree progresu estádiu
rua ne’e. “Ami atu halo konfirmasaun para estádiu rua ne’e ida ne’ebé maka
prontu ona atu hala’o Super Tasa,” nia dehan.
Leovigildo
informa SEJD sei hametin kooperasaun ho Liga Futeból Amadora para bele prepara
jogadór sira ho kualidade no konvida LFA atu bele promove di’ak liu-tan jogadór
foun sira para sira preparadu iha selesaun nasionál iha futuru. (jornalista:
Xisto Freitas; editora: Rita Almeida)
Foto:
Prezidente LFA, Nilton Gusmão akompañada hosi Prezidente Asembleia LFA,
Olandina Caeiro bainhira dadalia ho jornalista sira iha edifísiu SEJD. Foto
ANTIL/Xisto Freitas
Sem comentários:
Enviar um comentário