ADEUS TINAN 2016

Jornal Nacional, editorial

La kleur tan, hela deit loron ida, ita sei husik tinan tuan 2016 hodi simu tinan foun 2017. Jornada tinan 2016 nian, lanega buat diak nebe akontese iha rai ida nee iha tinan tuan nia laran maibe mos lasubar buat barak nebe lao ladiak iha planeta mundo nee.

Iha tinan tuan nia laran mundo nakonu ho instabilidade, funu iha Suriah, funu Palestina ho Israel, labarik no inan feton sira terus iha refujiadus nia laran, rai nakdoko iha Aleppo nebe lori sofremento no mate.

Diak ka at, kontenti ka triste, satisfaz ka la satifaz buat nebe akontese iha tinan 2016 laran sai lisaun ba mundo atu oinsa bele evita akontesimentu hanesan hodi hafoer tinan foun 2017 nebe la kleur tan ita atu simu.

Buat hotu nebe akontese iha liu ona hela ba historia hodi simu tinan foun  ho pensamento foun no espiritu foun hodi hahu jornada foun iha tinan foun nian laran. Tinan foun lori esperansa foun, eperansa ba moris foun nebe diak liu tinan tuan nian.

Balanzu desenvolvimentu politika, seguransa no ekonomia iha Timor Leste iha tinan 2016 nian bele dehan balanzu positivu. Situasaun politika normal, seguransa laiha situasaun ida nebe akontese hodi dezestabiliza situasaun seguransa iha rai laran no mos desenvolvimentu ekonomia lao normal, maske akontese mina folin tun nebe afeita ba rendementu Fundo Petroliferu Timor Leste nian.

Agora oinsa esperansa ba tinan foun 2017? Klaru tinan foun mai povu Timor Leste sei iha festa demokrasia boot rua, eleisaun Presidensial fualan Marsu nia laran no eleisaun Parlamentar iha inisiu fulan Jullu.

Festa demokrasia nee sei desafia maturidade politika politiku nain sira, kandidatu sira nebe kompete ba eleisaun presidensial no maturidade politika partido politiku sira iha eleisaun parlamentar.

Laiha duvida mundo tomak ohin loron nee sei konsidera Timor Leste sei Estadu fragile ‘nurak’, ne’ebe estabilidade nebe nasaun iha lagarantia Estadu nee metin no forte. Buat nebe sai sasukat mak Timor Leste too ohin loron sei esiste konfrontos Grupo Arte Marsiais (GAM) iha luron nebe Estadu la konsege kontrola.

Festa demokrasia, eleisaun presidensial no parlamentar mai nee mos sei koko kapasidade inistitusaun seguransa atu oinsa bele asegura eleisaun sira nee bele lao iha ambiente paz no trakuilu hodi sidadaun ida idak bele eserse direitu iha prosesu demokrasia nee.

Nunee mos partido politiku sira sai fator determinante ba estabilidade no seguransa rai laran tamba edukasaun politika partido politiku sira ba militantes importante hodi evita violensia iha tempo eleisaun no fo sai resultadus.

Eleisaun nudar jogu politiku, iha lakon no iha manan. Ida nebe manan laos orgulho maibe manan ho haraik an hodi hakuak ida nebe lakon, nunee mos ida nebe lakon tenki simu realidade.

Ne’ebe dala ida tan, iha biban ida nee, loron ikus tinan tuan 2016 hodi Redasaun Grupo Media Nacional, Jornal Nacional Semanário e Jornal Nacional Díario hatoo Boas Festas Santo Natal no Feliz Tinan Foun 2017 ba povu tomak, espesialmente ba leitores no asinantes tomak GMN nian.

Espera katak “Ksolok Natal no Tinan Foun nian sai hanesan fontes ba ita ida idak atu hametin liu tan  ita nia amizade, fiar no domin iha Nain Nia Moris”. Adeus tinan 2016 e Bemvindo tinan 2017, Year of hope. *