Taur Hakarak Horta Kandidata A’an Ba Prezidente Repúblika

DILI (ANTIL) - Atuál Prezidenti Repúblika, Taur Matan Ruak, hakarak eis Prezidenti Repúblika, Dr. José Ramos Horta kandidata a’an ba Prezidenti Repúblika periodu (2017-2022).

Horta haktuir katak razaun Taur dudu nia ba Prezidenti Repúblika tanba nia iha esperiénsia lidera Nasaun, halo servisu di’ak, imparsiál (neutrál) no laiha partidu.

“Taur hateten ba ha’u katak Nasaun ne’e tenke ukun hosi ema ne’ebé laiha partidu,” nia dehan ba jornalista sira iha Palásiu Prezidénsia Repúblika, Bairo-Pité, Dili, Kinta (29/12), hafoin halo sorumutu ho Prezidenti Taur Matan Ruak.

Nia informa iha eleisaun jerál 2017 mai ne’e, figura kaliber na’in tolu maka sei kompete malu maka hanesan Xanana Gusmão ho partidu CNRT, Lu-Olo no Marí ho FRETILIN no Taur ho PLP. Tanba ne´e, Horta informa, Taur hakarak tenke iha Prezidenti Repúblika ne’ebé hakalma parte tolu ne’e. “Tanba ne’e, nia (Taur) rasik dudu ha’u para ba oin,” nia hateten.

Maske nune’e, Diplomata senior ne’e haklaken, máximu, iha tempu semana ida nia laran, nia sei deside atu kandidata a’an ka lae.

“Kandidata a’an atu halo saida? Prezidente Repúblika nia poder ne’e limitadu loos. Dala barak ita sai frustradu tanba ko’alia ba Governu maibé Governu tilun di’uk no la rona saida maka ita hato´o. Ne’e duni, ha´u agradese ba Taur nia konfiansa mai ha´u maibé ha’u sei tetu másimu semana ida nia laran maka desidi,” eis Primeiru Ministru esklarese. (Jornalista: Xisto Freitas, Editor Otelio Ote)

Foto: Imajen Prezidenti Taur. Dok. ANTIL