sexta-feira, 17 de março de 2017

BNU hatama sistema hanesan ho multibanku portugés iha nia rede iha Timor-Leste

PARTILHAR
BNU, reprezentante CGD nian iha Díli no banku boot iha termu depózitu no kréditu sira nian hosi banku haat ne'ebé halo operasaun iha Timor-Leste, hahú ona funsionamentu iha semana ne'e ba sistema ida hanesan ho multibanku portugés.

Alterasaun ba plataforma kanal eletróniku sira ho solusaun SIBS no ne'ebé tenki halo alterasaun ba kartaun kliente sira hamutuk rihun 17, hahú ona funsiona iha semana ne'e hafoin prosesu naruk ida preparasaun nian.

Operasaun troka kartaun sira halo daudaun iha semana rua nia laran no halo ona BNU tenki loke nia dependénsia sira iha findesemana, explika hosi diretor BNU iha Díli, Fernando Torrão Alves, ba Lusa.

"Ami loke fali iha loron-sábadu hodi kontinua prosesu troka nian", explika.

Tuir nia refere, plataforma foun hanesan "estável liu" duké antigu no permiti "inkluzaun hosi serbisu foun sira, hanesan selu impostu sira, taxa sira no serbisu públiku sira seluk" prepara mós "hodi halo interligasaun entre banku oioin ne'ebé maka halo operasaun iha Timor", iha modelu ida hanesan ho rede multibanku iha Portugal.

Torrão Alves explika katak iha tempu badak sei iha mós iha ATM fa'an pulsa telemóvel nian ba operador tolu telekomunikasaun nian ne'ebé halo operasaun iha Timor-Leste.

Sei funsiona mós solusaun foun ida, Mobile Money, ne'ebé "sei aprezenta mós solusaun foun sira ba apoiu ba inkluzaun finanseiru nian".

Agora daudaun BNU instala ona unidade pagamentu hamutuk 80 resin tuir kartaun iha estabelesimentu komersial prinsipal sira - restaurante sira, hotel sira, supermerkadu sira, klínika sira no estasaun sira serbisu nian.

"Ami hakarak atu emprezáriu barak komprende vantajen sira hosi serbisu seguru ida hanesan ne'e. Objetivu maka kria kondisaun sira atu kliente sira selu ho kartaun no la'ós selu ho osan", nia refere.

Banku prepara mós iha fulan rua oinmai hodi hahú fó sai kartaun kréditu sira, sira ne'ebé dahuluk hosi sistema bankáriu nasaun nian.

Kona-ba faktu, iha semana hirak ikus ne'e iha ona kliente barak BNU nian iha Díli - iha dependénsia tolu ne'ebé nakloke - aumenta maka'as, Torrão Alves explika katak akontese tanba iha mudansa iha kobransa sira hosi instituisaun públiku sira.

Lahó avizu ruma ka informasaun antes ba BNU, Diresaun Nasional Transporte Terestre nian (DNTT) "taka ona nia atendimentu rasik ba kobransa sira iha sira nia instalasaun no haruka ema sira selu ba balkaun sira" iha banku portugés.

Polísia Nasional Timor-Leste nian (PNTL) mós foti desizaun hanesan kona-ba pagamentu multa sira nian.

"Ami atende hela, lahó kontrapartida finanseiru ruma, ema hamutuk na'in 300 ka 500 loron ida, prejudika atendimentu ba ami nia kliente sira", Torrão Alves explika.

"Iha tempu badak ami sei haruka pagamentu sira ne'e ba alternativu sira pagamentu eletróniku nian no ami konta ho aseitasaun hosi Estadu, tanba ho dalan seluk entaun ami tenki foti medida alternativu sira hodi ami labele prejudika ami nia kliente sira", nia hatutan.

Torrão Alves fó hanoin katak utiliza ona BNU hodi selu impostu sira maibé, lahó notifikasaun ida, agora iha ona pagamentu foun sira ne'ebé aumenta, nune'e hamosu liu presaun kona-ba atensaun ba kliente sira banku nian.

Serbisu sira ne'e la halo hosi banku sira seluk ne'ebé halo operasaun iha Timor-Leste.

Agora daudaun BNU halo hela obra sira iha nia sede prinsipal, iha sentru Díli nian, ne'ebé harii hela zona automátiku ida ho 8 ATM, no sei harii "solusaun ida jestaun eletróniku nian ba fila sira, aumenta ba ajénsia iha sentru komersial Timor Plaza".

Ho mundu ida ho kliente rihun 70 resin, agora daudaun BNU iha kaixa multibanku hamutuk 80 iha Timor-Leste, ho prezensa iha munisípiu 12 entre munisípiu 13 (ida ikus sei hakotu iha tinan ne'e), fó serbisu ba funsionáriu timoroan hamutuk na'in 126 no funsionáriu internasional na'in hitu (entre sira maka diresaun jeral).

Banku dahuluk ne'ebé maka halo instalasaun iha Timor-Leste no banku antigu liu ne'ebé maka halo operasaun iha teritóriu, BNU, ne'ebé halo parte hosi grupu Caixa Geral de Depósitos, loke nia ajénsia dahuluk iha Díli iha tinan 1912, iha kapital timoroan, Díli, hafoin tinan tolu halo sirkulasaun ba nota privativu dahuluk sira ba Timor-Leste.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: