KI Apela Autoridade Fasilita Jornalista Halo Kobertura

DILI – Konsellu Imprensa (KI) nudar orgaun instituisaun media neebe independente, husu ba autoridade lokal no nasional inklui autoridade seguransa atu fasilita jornalista halo kobertura ba iha eleisaun.

Prezidente Konsellu Imprensa (KI), Virgilo Guterres husu ba jornalista sira neebe halo kobertura iha eleisaun prezidensial ho didiak, labele sai fali materi kobertura katak sai problema nia hun.

Hau lori media sira nia naran apelu autoridade sira neebe iha kampu no seguransa sira fasilita jornalista sira atu halo kobertura,” dehan Prezidente Konsellu Imprensa (KI), Virgilo liu husi diskursu iha serimonia enkontru entre STAE ho KI iha salaun STAE, Caicoli-Dili, Sesta (17/03/2017).

Prezidente KI, Virgilo haktuir, tanba nee mak mai iha nee hodi briefing jornalista sira neebe hetan akreditasaun husi STAE, konaba papel media iha eleisaun prezidensial tinan 2017. Virgilo afirma, notisia importante ema atu hatene maibe seguransa ba an importante liu, tanba kuandu moris mak fo notisia, se mate ona notisia laiha, ema mak sai notisia, jornalista sira atu kuidadu-an.

Iha fatin hanesan, Diretor Jeral STAE, Acilino Manuel Branco dehan, kontribuisaun media importante tebes iha prosesu eleisaun hahu husi ekeisaun suku too eleisaun jeral.

Tuir Observasaun STL iha enkontru nee partisipa husi jornalista nasional sira hanesan Jornal Suara Timor Lorosae (JSTL), Jornal Nasional Diariu (JND), Jornal Independent (JI), Jornal Timor Post (JTP), Jornal Timoroman (JT), Majalah Time Timor (JTT), Jornal Semanal Matadalan (JSM), Radiu Timor Leste (RTL), Radiu Klibur, Televizaun Timor Leste (TVTL), Online Tafara, ANTIL no seluk tan. Raimundo S. Fraga

Suara Timor Lorosae