ESTRADA KARIMBALA AMEASADU KOTU, PN KONSIDERA FALHA IHA ESTUDU VIABILIDADE

Parlamentu Nasional (PN) konsidera estrada iha area Karimbala nian ne’ebe liga Munisipiu Liquica ho Bobonaro, ameasadu atu kotu tanba falha iha estudu viabilidade.

Iha tempu udan bot, foin lalais ne’e, kondisaun estrada Karimbala nian la seguru tanba fatuk bot namtate tun husi foho lolon mai estrada laran no estrada rasik mos kuaze atu monu tun iha ba rai lolon parte tasi nian.

Parlamentu Nasional (PN) liu husi Komisaun E ne’ebe trata ba asuntus Infra-estrutura no Telekomunikasoens, fo hanoin ona ba Governu, atu seriu tau atensaun ba kondisoens Estrada refere tanba gasta osan bot husi osan imprestimu nian.

Vise Prezidente Komisaun E,  Manuel Castro, hateten, problema nia hun ba situasaun Estrada Karimbala nian, mak antes antes implementa obra ne’e tenke halo uluk estudu viabilidade.

“Parlamentu sempre hakilar bei-beik ba Governu presiza teb-tebes  estudus viabilidade, kuandu estudus ne’e la lalos maka ikus mai afeta ba obra,”afirma deputado Manuel Castro, hodi responde JN-Diario, iha uma fukun PN, Segunda (08/05/2017).

Mega projetus Estrada Liquica to’o Fronteira Batugade ne’e ejekuta husi kompanha internasional PP husi Indonesia, ne’ebe maka remata tiha ona sira nia servisu iha tinan 2016, maibe prosesu retensaun ka manutensaun nia laran. Obras ne’e rasik gasta orsamentu milhoens 200 USD ne’ebe impresta husi Banco Dezenovlvimento Aziatico (ADB/Asean Development Bank).

Iha fatin hanesan, deputado Cesar Valente “Pilotu”, husu ba Governu tenke tau lalais emergensia iha area refere hodi nune’e la bele difikulta movimentu transporte publiku.

“Hau hanesan reprezentante povu sente preokupa, ne’ebe ejiji ba Governu tenke halo atendimentu emediatu ba dezastre sira ne’ebe prejudika estrada,” hateten Deputadu Cesar Pilotu.

Nia argumenta katak, wainhira estrada at maka prezudika mos ba iha komunidade nia moris, tanba sira la bele transporta produtus no halo viazen mai capital no munisipius.

Observasaun JN-Diario iha tereno nota katak, estrada ne’e ameasadu kotu tanba monu kuaze metro rua ona, no moru ne’ebe satan rai mos la biban hodi nune’e rai monu hodi taka netik estrada no mos fatuk taka netik estrada hodi difikulta ba transporte publiku. mia

Jornal Nacional Diário