Illa indonézia Flores selebra tinan 100 hosi "aparisaun" Fátima nian

Dioseze katólika Larantuka, iha illa indonéziu Flores, sei asosia ho vijília ida ho orasaun hodi selebra tinan 100 hosi "aparisaun" Maria nian iha Fátima, hatete hosi bispu lokal iha loron-kinta ne'e. 

"Ami halo tuir tebes Fátima no iha ne'e iha devosaun boot ba Nossa Senhora de Fátima", afirma hosi Franciscus Kopong Kung, iha deklarasaun sira ba Lusa liuhosi telefone.

"Ami sei selebra tinan 100 ba aparisaun iha Fátima. Ha'u sei la ba Portugal, maibé ami sei selebra iha ne'e iha ligasaun espiritual importante ida entre nasaun rua", explika hosi bispu indonéziu, hodi hanoin hikas katak illa Flores iha tradisaun katólika maka'as no kultu marianu sira nian.

"Nossa Senhora hanesan prezensa maka'as ida iha ema sira ne'e nia moris, tanba iha mós rejistu kona-ba aparisaun sira iha sékulu barak nia laran, antes mós hosi kolonizasaun portugeza nian", hatutan hosi bispu.

To'o tinan 1851, illa Flores halo parte hosi impériu portugés no fa'an tiha ba holandés sira hosi governador Timor nian lahó koñesimentu hosi koroa portugeza.

Heransa portugeza nian iha zona ne'e bele haree iha trasa kolonial maibé mós prezensa hosi katolisizmu, ho manifestasaun sira fiar nian ne'ebé maka'as liuliu iha selebrasaun sira Semana Santa nian.

Larantuka koñesidu mós hosi tradisaun ne'e, ho sékulu rua resin, reza tersu iha lian portugeza, buat ne'ebé maka akontese iha loron-sábadu sira iha “Gereja Tuan Ma” ka Kapela Senhora Mãe.

Ohin loron, iha nasaun musulmanu boot iha mundu, númeru hosi ema katóliku sira aumenta ho dalan regular, maibé la hamosu buat ida relasionadu ho relijiaun sira seluk, hatutan hosi Franciscus Kopong Kung.

"Iha relasaun di'ak sira entre relijiaun sira ne'ebé iha fiar la hanesan", maibé "igreja katólika aumenta daudaun" tanba "kristaun sira hanesan unidu tebes hodi defende sira nia fiar" no iha "divulgasaun hosi Kristu nia mensajen", konsidera hosi bispu.

Papa Francisco partisipa iha loron-sesta no iha loron-sábadu iha selebrasaun sira tinan 100 nian ba "aparisaun sira" marianu nian iha Cova da Iria, ne'ebé sei sai hanesan nia vizita dahuluk iha Portugal.

Iha loron 13, Francisco sei prezidi serimónia sira kanonizasaun ba Francisco ho Jacinta Marto, labarik na'in rua hosi labarik na'in tolu ne'ebé maka hanesan orijen hosi fenómenu Fátima nian iha tinan 1917.

SAPO TL ho Lusa