quarta-feira, 24 de maio de 2017

Tinan ne'e migrante rihun 60 to'o ona iha Europa no rejista ona na'in 1.300 mate

Migrante no potensial refujiadu sira ne'ebé to'o ona iha 2017 iha Europa liuhosi Mediteráneu to'o ona ema na'in 60.000, entre sira maka rejista ona na'in 1.300 mate, fó sai hosi Organizasaun Internasional ba Migrasaun sira (IOM) iha loron-tersa ne'e.

Sira ne'ebé mate hanesan konta hosi 01 Janeiru to'o 22 Maiu, espesifika hosi komunikadu hosi ajénsia ONU nian.

Mate sira ne'e barak liu akontese iha Mediteráneu sentral, ne'ebé halibur norte Áfrika ho Itália no konsidera agora daudaun hanesan dalan perigozu liu iha mundu.

Entre na'in 59.153 ne'ebé to'o hosi Mediteráneu iha tinan 2017, na'in 50.041 relasionadu ho Itália, situasaun ne'ebé la hanesan ho rejistu iha 2016, bainhira Grésia simu refujiadu barak ne'ebé to'o.

Entre fulan-Janeiru no fulan-Maiu 2016, to'o ona iha Europa migrante na'in 190.977, ho na'in 156.000 diriji ba Grésia no na'in 33.000 ba Itália.

Maski hosi númeru total sira migrante nian ne'ebé iha tinan 2017 konsege to'o iha kontinente europeu ki'ik hosi númeru ne'ebé rejista iha tinan liubá, total hosi sira ne'ebé mate iha períudu rua ne'e hanesan.

Tuir IOM, iha 2016 mate ona pelumenus migrante na'in 1.381 bainhira tenta atravesa Mediteráneu, bainhira iha 2017 iha ona ema na'in 1.340 mate tanba mout ka tanba kauza sira seluk ne'ebé hanesan.

Númeru hosi mate-isin sira ne'ebé rekuperadu iha tasi laran interior iha tinan 2017 aumenta ba na'in 226.

Grupu migratóriu aumenta maka'as iha semana ikus ne'e iha Mediteráneu tanba kondisaun atmosfériku sira ne'ebé di'ak.

Iha findesemana liubá, Guarda kosteira italianu salva ona migrante rihun haat resin, haktuir hosi ajénsia ONU.

SAPO TL ho Lusa | Foto@ Orestis Panagiotou /EPA

Sem comentários: