PM timoroan hatete katak Governu tuirmai tenki kontinua ajenda reforma sira nian

Iha loron-segunda ne'e primeiru-ministru timoroan hatete ona katak Governu ne'ebé sei harii hosi eleisaun lejislativu sira loron 22 Jullu nian tenki kontinua ajenda hosi reforma nasional sira ne'ebé halo daudaun ne'ebé hanesan importante, tuir nia hatete, ba sustentabilidade ekonómiku nasaun nian.

Rui Aráujo admiti ona ba Lusa katak la'ós ema timoroan tomak hatene ajenda boot ne'ebé hahú iha nia mandatu no ne'ebé halo parte reforma no fomentu ekonómiku, reforma fiskal, reforma hosi administrasaun públika no reforma lejislativu no hosi área justisa nian.

"Ha'u fiar katak sira la hatene, maibé mós hanesan responsabilidade hosi Governu hodi fahe informasaun ne'e, fó koñese informasaun ne'e ba sidadaun tomak, hodi bele sensibiliza tan komunidade", nia explika ba Lusa iha Díli.

Rui Maria de Araújo ko'ali bainhira loke expozisaun ida kona-ba progresu ne'ebé hetan iha prosesu reforma sira hosi Governu konstitusional daneen no iha tempu ne'ebé Timor-Leste hanoin ona iha futuru Governu ne'ebé sei harii hosi votu parlamentar iha fulan oinmai.

"Ha'u fiar katak kontinuidade hosi reforma sira ne'e hanesan dalan ba sustentabilidade ekonómiku nasaun nian", nia afirma hodi explika katak iha tinan rua hosi nia mandatu, Governu konsege ona harii konseitu ida kona-ba saida maka halo no fó hakat dahuluk sira iha implementasaun.

"Hosi hanoin ba harii konseitu no iha konseitu sira ne'e iha nia faze dahuluk implementasaun nian ami konsege buat barak. Agora tenki kontinua ho ida ne'e", nia hatete.

Iha intervensaun ida hodi hahú expozisaun, Rui Araújo felisita ona esforsu dezenvolvimentu sira hosi Ministériu barak hodi "hanoin no implementa pensamentu reforma nian", ajuda atu "hahú sai realidade".

"Bainhira Timor-Leste hakarak avansa iha dezenvolvimentu sustentável presiza kontinua reforma sira ne'e. Hafoin eleisaun sira, tenki kontinua prosesu ne'e", nia hatete no subliña katak importante liu maka "interese nasional sira no la'ós interese partidáriu sira".

Nia refere ona katak populasaun timoroan hatene katak "ne'e hanesan prosesu ida ne'ebé halo hela" no presiza "rekursu ema nian maka'as, tékniku sira no material sira hodi bele implementa iha horizonte temporal ida ne'ebé realista".

Haree liuliu ba sosiedade sivil no ba media nasional sira, expozisaun loron-segunda nian inklui divulgasaun hosi detalle sira kona-ba dalan oioin hosi reforma sira ne'ebé halo daudaun, hosi alterasaun sira hodi hadi'a no hametin ambiente ekonómiku ba reforma integral ida hosi sistema judisial no hosi kuadru lejislativu.

Alterasaun sira no reforsu hosi kapasidade administrasaun públika nian, inklui fortalesimentu hosi kapasidade sira rekursu ema nian, hanesan área sira seluk hosi ajenda boot reforma sira nian.

SAPO TL ho Lusa