terça-feira, 6 de junho de 2017

Rezolve Disputa Marítima TL Agradese Lideransa ASEAN

DILI, (TATOLI) - Governu Timor-Leste (TL) liuhusi Vise-ministru Negósiu Estranjeiru no Kooperasaun, Roberto Soares  agredese lideransa ASEAN (Association of South East Asean) tan uza direitu internasionál no konvensaun relevante hodi rezolve disputa marítima iha Tasi Sul Xiña nian.

“Agradese tebtebes lideransa ASEAN no parte sira ne’ebé iha disputa,” vise-ministru agredese bainhira partisipa iha ASEAN Regional Forum Official meeting, tersa (24/05) iha Passay City,Filipina, haktuir komunikadu Ministériu Negósiu Estranjeiru ba Ajénsia Tatoli ohin.

Governante ne’e hato’o agradesementu tanba nasaun país-membru ASEAN balun hanesan Vietnam, Filipina, Brunei Darussalam, Malázia no Xina nu’udar parseiru diálogu ASEAN manifesta sira-nia lideransa no mantein nafatin diálogu no buka solusaun pasífika ba disputa iha Tasi Sul Xina nian ne’e.

Nune’e mós vise-ministru ne’e louva mós país-membru  nasaun unida tanba inklui ona alterasaun klimátika iha Meta Dezenvolvimentu Sustentável (MDS).

Meta 13 nu’udar ajenda globál ida ne’ebé mundu tenke responde ho urjénsia. Maske define tiha ona iha MDS, país tomak presiza hatudu seriedade hodi traduz meta ida ne’e iha polítika no lejislasaun sira iha nível nasionál.


Mudansa klimátika, nia haktuir “la’ós deit problema estadu illas/insulares ki’ik sira nian, maibé ne’e sai nu’udar problema mundiál, problema seguransa no sobrevivénsia globál,” nia akresenta.

Nune’e mós, Vise-Ministru Roberto Soares  ko’alia kona-ba importánsia atu estabelese parseria no kooperasaun ida di’ak entre país sira hodi iha esforsu atu rezolve problema tráfiku droga no tráfiku umanu.

Iha mundu globalizadu ohin-loron ne’ebé iha mudansa maka’as iha informasaun no teknolojia ne’ebé infelizmente fasilita liutan sindikatu droga no tráfiku umanu hodi hala’o sira-nia negósiu.

“Tanbá ne’e, presiza duni esforsu ida kordenadu entre país sira hodi responde ba problema seguransa ida ne’e,” nia reforsa.

Partisipa iha inkontru nível ofisiál seniór, alende Vise-Ministru Roberto Soares inklui mós Diretór-jerál ba Asuntu ASEAN, Embaixadór Jorge Camões, Embaixadór Timor-Leste ba Filipina Juvencio Martins, Asesór Francisco L. Santos no vise-ministru rasik mak nu’udar lider delegasaun.

Jornalista: Rafy Belo | Editór : Manuel Pinto

Foto: Roberto Soares

Sem comentários: