Politiku Diak, Laos Deit Ukun, Maibe Prepara Sidadaun Sai Responsabel

DILI – Oras nee haree ba kampana ba Eleisaun Parlamentar (Elpar), lao dadaun, tanba nee eis primeira Dama Isabel Fereira husu ba parpol sira atu politika labele deit ukun, maibe atu prepara sidadaun sai responsabilidade iha nasaun ida nee.

Tuir Eis Primeira Dama Isabel Fereira hatete, nia halo komparasaun iha tinan 2012, ba kampana politika ho agora nian nee nia haree ba diak, maibe presiza hadia liu tan, tanba nee parpol sira iha kampana tenke hatudu politika neebe mak atu hodi eduka sidadaun sira atu responsabilidade ba futuru nasaun.

Hanesan sidadaun no hanesan mos ativista hau hanoin katak Timor bele fo ezemplu ba mundu, laos hatudu no konta deit pasadu hatudu hanesan lutador, maibe atusai hanesan lider politiku foun, ou sai hanesan mediku no edukador,” katak Isabel ba STL Kinta (06/07/2017) iha Ministeriu Edukasaun Vila-Verde.

Nia fo ezemplu lia fuan Mahatmagandi dehan politika neebe diak, politik neebe hanesan mediku buka aimoruk atu kura moras. Maibe nia mos hakarak atu aumenta tan katak politiku neebe diak hanesan mos profesores atu forma ema ba diak.

Iha parte seluk, Reitor IOB Augusto da Conceicao hatete, hanesan akademika nia haree ba kampana nee Elpar nian nee hatun malu barak liu, neebe nia husu para parpol sira atu labele hatun malu iha kampana maibe atu oinsa hatudu programa neebe mak iha ida-idak nia partidu hodi nunee fo sai ba povu atu povu sira mos bele haree programa. Guilhermina Franco/Jacinta Sequeira

Suara Timor Lorosae