UE Koloka Observadór 26 iha Munisípiu 12

DILI, (TATOLI) – Adjuntu Xefe Misaun Uniaun Europeia (UE), Xabier Meilan hateten agora dadauk EU koloka observadór hamutuk 26 iha munisípiu 12 inklui Rejiaun Autónoma Espesiál Oecusse Ambeno (RAEOA) ho observadór rua durante kampaña no eleisaun lejislativa.

“Ema sira ne’e iha kontaktu permanente ho autoridade eleitorál, partidu polítiku hodi asiste atividade kampaña partidu polítiku no halo análize ida sé sira kumpri ona lei eleitorál Timor-Leste no obrigasaun internasionál ne’ebé Timor-Leste aseita no asina ona tratadu pertinente sira”, tenik ba ajénsia Tatoli iha nia kna’ar fatin, Otél Timor, kuarta (5/7).

Hodi dehan tan, parte EU ko’alia ona ho autoridade eleisaun hanesan Sekretariu Tékniku Administrasaun Eleitorál (STAE) no Komisaun Nasionál Eleisaun (sigla portugés-CNE) nível lokál, asiste no observa ona atividade kampaña para análize parte sira halo tuir ona lei, respeita direitu ema nian no kandidatu durante kampaña.

“Loron eleisaun, ami sei haruka observadór sira ba estasaun voto para haree ema sira bele iha direitu atu vota ho normál”, afirma tan.

Nune’e nia dehan, loron rua hafoin eleisaun UE sei aprezenta ba meius komunikasaun sosial sira konaba konklusaun ne’ebé UE halo ona durante kampaña, saida mak haree antes eleisaun no durante tempu kampaña.

Antes ne’e Diretór Jerál STAE, Acilino Manuel Branco hateten observadór husi EU ba eleisaun lejislativa hasoru malu ona ho nia hodi renova sira nia mandatu ba festa demokrasia hafoin eleisaun prezidensiál.

Jornalista: Julia Chatarina | Editora: Rita Almeida