Juiz TL Presiza Formasaun Adekuada

DILI, (TATOLI) - Prezidenti Repúblika Francisco Guterres Lú Olo hakarak iha formasaun adekuada ba Juiz timoroan sira atu bele halo servisu di’ak liu tan.

“Husu mós ba parte kompetente atu rezolve dezafiu sira ne’ebé maka Tribunál Rekursu (TR) infrenta,” Prezidenti Tribunál Rekursu, Deolindo dos Santos konta tuir Prezidenti Repúblika Lú Olo nia liamenon ba jornalista sira iha Palásiu Prezidénsia Repúblika, Bairu-Pité, Dili, Sesta ne’e, hafoin realiza enkontru.

Tribunál Rekursu, Tuir Deolindo dos Santos ohin loron kazu barak pending tanba TR iha limitasaun rekursu umanu atu prosesa kazu hirak ne’e.

Realidade hatudu ohin loron TR iha juiz na’in tolu de’it nune’e fó implikasaun ba prosesamentu kazu sira ne’ebé tama iha TR.

“Realmente, ami hasoru dezafiu. Kazu barak maka sei pendente no  kondisaun serbisu ba juiz sira seidauk di’ak. Ohin loron, ami iha juiz na’in tolu de’it maka prosesa kazu hirak ne’e. Maibé, dezafiu ida ne’e hanesan motivasaun ida atu ami bele halo buat ne’ebé di’ak liu-tan,” Deolindo hato’o.

Hodi kontinua esplika sorumutu ho Prezidenti Repúblika, ko’alia kona-bá TR nia serbisu lor-loron. Ko’alia mós kona-bá kestaun formasaun ba juiz sira no kestaun infraestrutura tribunál ninian tanba to’o ohin loron kondisaun balun seidauk favorese ba kuadru tribunál atu halo sira nia serbisu.

Iha Tribunál to’o ohin loron, seidauk instala Supremu Tribunál no instalasaun foun Tribunál Distritál Dili.

Jornalista: Xisto Freitas | Editór: Manuel Pinto

Foto: Prezidenti da Repúblika Francisco Guterres Lú-olo (liman-los) tur ho Prezidenti Tribunál Rekursu, Deolindo dos Santos, iha Palasio Prezidensial, Bairo-Pite, Segunda (12/06). FOTO Mídia PR