MNE timoroan garanti katak Governu sei kumpri kompromisu sira maski hosi situasaun polítika

Iha loron-sesta ne'e, Governu timoroan garanti ona ba korporasaun diplomátiku ne'ebé akreditadu iha Díli katak sei kumpri sira nia kompromisu tomak, refere katak maski agora daudaun iha tensaun polítika, Timor-Leste "merese nafatin konfiansa internasional".

"Nasaun kontinua estável, pasífiku, ho atividade sira la'o hanesan baibain", hatete hosi Aurélio Guterres, ministru Negósiu Estranjeiru no Koperasaun, iha enkontru ida ho diplomata sira, liutiha loron ida hafoin opozisaun aprova tiha iha Parlamentu Nasional proposta rejeisaun ida hasoru programa Governu nian.

"Programa sira hotu hala'o hela ho normalidade no administrasaun estatal sei kumpri nia kompromisu tomak. Timor-Leste sei kontinua hanesan ezemplu hosi konstrusaun Estadu nian no merese hetan konfiansa hosi ema tomak", nia afirma durante enkontru badak ida.

Apela ba "investidor internasional sira no ba empreza sira hodi tau nafatin nia konfiansa iha Timor-Leste", xefe diplomasia hatete katak prosesu polítiku ne'ebé hala'o hela to'o ikus sei fó benefísiu ba povu no ba nasaun.

Nia konfirma mós katak Governu sei halo, iha semana hirak tuirmai, aprezentasaun daruak hosi programa ezekutivu nian maski la'ós primeiru-ministru, Mari Alkatiri, maka sei defende testu iha parlamentu.

Proposta ne'e aprova ho apoiu hosi bankada sira Congresso Nacional da Reconstrução Timorense (CNRT) no Partidu Libertasaun Popular (PLP) - lidera hosi eis-Prezidente sira no líder istóriku timoroan sira Xanana Gusmão ho Taur Matan Ruak - no hosi deputadu sira hosi Kmanek Haburas Unidade Nacional Timor Oan (KHUNTO), ne'ebé foin maka estreia iha parlamentu iha lejislatura atual.

Partidu tolu kontrola fatin 35 hosi fatin 65 iha Parlamentu Nasional hasoru fatin 30 hosi partidu sira koligasaun governu nian, Frente Revolucionária do Timor-Leste Independente (Fretilin) ho Partidu Demokrátiku (PD).

Aurélio Guterres garanti ona katak prosesu polítiku tomak sei respeita tebes Konstituisaun no nia esplika ona katak líder nasional sira sei halo diálogu, hodi hein Xanana Gusmão fila ba Timor-Leste "iha semana oinmai".

"Ami sei tenta tan komunikasaun, aumenta debate. Ami hein hela ami nia líder ne'ebé iha hela estranjeiru. Ami hein katak iha semana oinmai nia fila. Loos duni katak ami sei ko'alia no ha'u fiar katak ami sei hetan akordu ida hodi hadi'a nasaun ne'e. Laiha líder ida maka hakarak atu Timor-Leste sai hanesan Estadu falladu ida", nia afirma.

SAPO TL ho Lusa | Foto: MNE Aurélio Guterres / RTTLep