Roger Rafael Soares * | opinião
Uma
Fukun Nasional nudar fatin ida nebe lejitimu atu diskuti no apresia programas
governu nian, ba moris diak ita nia rain no ita nia povu. Mais duké ida ne´e,
Uma Fukun Nasional mos nudar fatin, iha nebe reprezentante povu nian hala´o
debates no diskusoens politikas hodi defende interese povu no futuru Nasaun
nian. Iha kumprimentu ba deveres nudar representante povu nian iha Uma Fukun
Nasional, deputadu sira la bele opta deit hodi tolan tomak programas nebe
governu aprezenta, tambá deit razaun ba interese nasional, dezenvolvimentu
nasional no interese povu nian, sein iha analizes kritikas nebe klean, nebe
hatur iha kompromisu seriu atu hasai no hadia povu ida ne´e husi kiak no mukit
nia laran. Deputadu sira presiza tetu no tau iha konsiderasaun boot
debates politikus husi programas politikus nebe aprezenta husi governu, nebe
koresponde ou lae, ho koerensia, rigor, exijensia, kompometimentu politiku
seriu, molok atu fo apresiasaun ka aprovasaun.
Iha
ámbitu poder fiskalizasaun no verifikasaun ba propostas no programas husi
governu - nebe sai hanesan dever no obrigasaun mos husi representa povu
nian iha Uma Fukun Nacional - rejeisaun no aprovasaun husi programa
governu, hola parte iha normalidade no naturalidade iha demokrasia
reprejentativa, nebe adota mos iha ita nia lei inan.
Nune´e,
faktus nebe rejista, ligadu ho mosaun rejeisaun ba programa governu nian, la
signifika, tuir hau nia hare, desrespeitu ba vontade povu nian, hodi
espekula no kria krize politika desnecesária sein precedentes ba ita nia
Nasaun, maibe, nudar atu normal no natural husi jogu demokratiku, iha nebe, ita
presiza interpreta katak, sai opozisaun iha Uma Fukun Nacional la signifika atu
simu ka konkorda tomak programas nebe governu aprezenta. Rejeisaun ida
ne´e hatur iha diferensa ideolojia no programatika entre partidus nebe existe,
i tambá razaun ida ne´e maka, durante kampañha eleitoral, partidu ida-idak
aprezenta ba eleitoradus sira, diferensas no especificiedades iha ámbitu programas
politikus. Se karik partidu ida maka tenki, obrigatoriamente, aceita ka
konkorda ho programa partidu seluk nian, diak liu, lalika lakon tempu hodi harí
partidu barak, maibe sim, ita hotu afilia ba partidu ida deit. Iha aspektu
diverjensia programatika ida ne´e maka, hau hanoin, Bloku Maioria Parlamentar
nebe kompostu husi Partidu CNRT, PLP no KHUNTO, mosu ho objektivu atu aprezenta
alternativas ba governasaun ida nebe estável, durável no segura hasoru VII
Governu Konstitusional nebe frazil no indefensável, formadu husi FRETILIN ho
PD.
Maibe,
wainhira ita observa komportamentu husi opiniaun publika relasiona ho
konjuntura politika ida ne´e, pergunta no kestaun frekuentementes nebe mosu iha
rede social no média social, maka interogasaun konaba atitude ilijitima husi
deputadus opozisaun nian, relasiona ho rejeisaun ba programa VII Governo nian,
fundamentadu akujasaun ho ideia falta nasionalizmu ou indiferente ho interese
povu nian. Se ita analiza didiak komportamentu hirak ne´e, ita bele konklui
katak, Pergunta no kestaun nebe mosu, la adekuada ho sirkustansias
politikas atuais, iha medida nebe ita hotu hatene katak, debate politiku iha
Uma Fukun Nasional, nudar asuntu ida nebe la iha relasaun oitoan ho povu nebe
sira koalia nudar sujeitu iha media social.
Karik
nune´e, hau harak kestiona, será ké interese povu nian nudar bandeira ida, iha
nebe ita hit kuandu ita iha situasaun difisil deit, no ita uza kuandu fó jeitu,
hanesan expresaun idiomátika ida nebe ita rekore ho frekuensia hodi fundamenta
manobras demagojikas no populistas?
Wainhira
ita monu ba tentativa ida ne´e, ita mos bele monu ba tendensia hodi
hamihis no hafraku demokrasia nebe iha hela prosesu konstrusaun nia laran,
tambá ita hotu hatene katak, jogu nebe ita asiste hela, hola parte iha demokrasia
moderna.
Ita
hotu konsiente katak Timor Leste presiza lao ba oin, maibe, iha parte seluk
mos, Timor Leste presiza konsolida Nia procesu demokratizasaun, no iha
procesu inicial ida ne, ita presiza aprende no kompriende natureza husi
demokrasia ne rasik, hodi labele interprete demaziada negativa ba
desizoens nebe representantes povu nian iha Uma Fukun Nasional foti.
Tambá mosaun rezeisaun nebe aprezenta husi opozisaun kontra programa nebe
aprezenta husi VII Governu iha Uma Fukun Nacional, hola parte mos husi regras
demokrasia ida nebe ita hotu uza no abuza ho orgulho.
Aprezentasaun
ba mosaun rejeisaun husi deputadus opozisaun sira laos signifika fim husi
prosesu tomak nebe iha kursu, maibe, nudar inisio husi prosesu ida nebe, kabe
ba S.E senhor Presidente da Republika, autoriedade no kompetensia tomak, hatuir
iha KRDTL, hodi foti medidas nebe adekuadas tuir dalan juridiku nebe
vigora iha ita nia Estadu, seim provoka instabilidade institucional
desnecesária.
Iha
momentu de turbulensia politika ida ne´e, se ita tenki eskolha liafuan nebe ita
preciza, presizamente korajen. Korajen atu foti desizaun politika nebe
kontradiz ho ita nia pozisaun, hodi ultrapasa situasaun difisil nebe ita hotu
hasoru; korajen hodi assumi kompromisu politiku no aseita regras husi jogu
demokratiku ida ne´e; korajen atu tane as interese Nasaun nian duké interese
ideolojia partidu nian; korajen atu hili dalan ho responsabilidade hodi
salvaguarda jerasaun timor nian iha futuru oin mai. Tambá ita hotu presiza
politikus nebe korajosus hodi didika an ba kauza komum liu husi submisaun
ba regras demokratikas, atu nune bele fo resposta no solusaun ba problemas nebe
ita nia governu hasoru.
Povu
Timor Leste sei moris iha prosperiedade nia laran, wainhira existe governu ida
nebe forte, estável no durável atu bele iha marjem ka espasu hodi implementa
programas politikus viáveis em prol ba dezenvolvimentu nasional no moris diak
ita hotu nian.
P.S.
Artigu ida ne´e la hakerek tuir padraun ortografiku tétum nebe estabelese husi
Institutu Nasional Lisguistika.
Rojer
Rafeal T. Soares
rrtsoares@hotmail.com
Sem comentários:
Enviar um comentário