sábado, 21 de outubro de 2017

Interpretasaun Konstituisaun Nakonu ho konfilitu Hatauk ho instabilidade

Sentimentu tauk kontinua hamoris iha povu nia le’et iha Timor-Leste. Konflitu intrepretasaun konstituisaun ne’e signifika katak partidu polítiku ida-ida ne’ebé la-aseita saida mak sei akontese bainhira governu monu. Tuir Konstituisaun Timor-Leste, governu sei monu bainhira Parlementu Nasional la aprova apresiasaun programa governu ba tempu dala rua. Tamba koligasaun governu FRETILIN-PD daudaun ne’e lasai maioria iha Parlementu Nasional, senariu ida ne’e iha biban boot bele akontese. Tuir interpretasaun koligasaun FRETILIN-PD katak, iha situasaun sira hanesan ne’e, Prezidente Repúblika tenke komvoka para bele halo eleisaun antisipada, ne’e sorin ida. Iha sorin seluk partidu CNRT, PLP, ho KHUNTO  ne’ebé halo Aliansa Maioria Parlementar intrepreta Konstituisaun katak, bainhira governu monu, maka Prezidente Repúblika tenke bolu fali partidu polítiku segundu mais votadu ou Aliansa Maioria Parlementar atu hari’i governu kolegasaun. Ho preparasaun ida ne’e mak partidu tolu ne’ebé halo opozisaun iha Parlamentar kria ona bloku “ Aliansa Maioria Parlametar” iha Kinta-Feira semana kotuk.

Interpretasaun kontraditoriu hirak ne’e halo Timoroan barak hanoin hikas krize 2006, iha ne’ebé kompetisaun entre diferente autór polítika nain sira bele kria rungu-ranga iha Dili. Intropusaun polítika ohin loron nian halo  polítika na’in sira ladun iha vontade atu buka konsensus ne’ebé halo situasaun aat no hamosu mos eransa aat iha tempu negro liu ba. Nu’udar konsekuensia hosi ida ne’e, povu nia tauk kona-bá stabilidade nasaun nain, kontinua habo’ot iha komunidade nia le’et. Nune’e mos, difirensia sira hotu, ho trauma krize 2006 bele dudu halo intervensaun hosi internasional ou ONU. ema barak nia tauk ne’e, difirensia polítika ne’ebé la’o daudaun ne’e bele kria tensaun ne’ebé hamosu fali forsa rai seluk nian  bele tama mai Timor-Leste.


Sentimentu tauk hanesan ne’e, halo ema halai tun-sae no hamosu sentimentu ameasadu ho konflitu. Kada loron, ema barak mak desloka sai hosi Dili ho transporte bis ba munísipio atu desloka an hosi tensaun polítika iha Dili. Ida ne’ebé halo ema lahakmatek, ema barak mak desloka sai hosi Timor-Leste, uza aviaun ho hakur fronteira terestre ba rai ketan ho Indonezia nian. Tendensia ida ne’e halo ema senti tauk ba tinan 2006, ne’ebé hadau malu poder ne’ebé provoka ba povu bain-bain nia tauk. Se laiha intervensaun polítika ne’ebé konstruktivu mak pániku públiku kontinua nafatin.

Atu hakotu situsaun sira ne’e, FM ofrese rekomendasaun tuir mai ne’e:

Polítiku na’in sira iha Timor-Leste tenke tau uluk interese estadu nia iha interese privadu. Ema hotu iha Timor-Leste hakarak stabilidade, tamba ne’e mak partidu polítiku sira hotu tenke hakalma an no kontinua nafatin kria unidade maske lakonkorda malu.

Partidu  polítiku sira tenke serbisu hamutuk atu minimiliza diferente intrepretasaun sira nian kona-bá konstituisaun. Visaun kontraditoriu kona-bá prosedur krusial nain sei habo’ot sentimentu tauk no  povu bain-bain sei lakon esperansa fiar nian ba governu.

Liderasan  Timor-Leste tenke servisu hamutk ba konsensus bazeadu ba stabilidade polítika. Ho nune’e mos fokus ba polítika real atu fó benefisu ba ema Timor hotu atu halo ajenda hamutuk hodi hases an hosi konflitu. Aproximasaun ne’ebé diak sei representa esperansa diak ba Timor-Leste ba futuru ne’ebé hakmatek ho prosperidade.

Fundasaun Mahein - Rua Comoro, Fomento I, Dili, Timor-Leste
Tel: +(670) 78316075

Sem comentários: