Aprezenta programa ba daruak, Governu sei kumpri orden BOAMP

Aprezentasaun programa VII Governu nian ba daruak iha Parlamentu Nasional (PN), Governu sei kumpri orden husi Bloku Opozisaun Aliansa Maioria Parlamentar (BOAMP), ne’ebé hakarak atu Governu hatama uluk programa ba daruak nian ho detalla no kompleta.

Xefi bankada Partidu Demokrátiku (PD), Maria Teresa, hateten, Governu seidauk fó data fiksu ba PN kona ba bainhira mak Governu aprezenta programa ba daruak. Maibe, Governu sei kumpri saida mak deputadu opozisaun sira hakarak.

“Programa ne’e tenki mai duni, maibé seidauk iha data fiksu, tanba Governu sei rekolla dadus, tanba deputadu sira husi opozisaun mak husu dadus ne’e, ho planu detallu, entaun Governu sei esforsu-an atu halo programa ida ne’ebé tuir opozisaun sira nia hakarak,” katak Maria Teresa ba jornalista sira iha PN, Sesta (01/12).

Alende ne’e, Maria Teresa mós informa, Orsamentu Retifikativu tama iha meja Parlamentu Nasional ho karakter urjensia,  maibé BOAMP rejeita karakter urjensia Orsamentu Retifikativu ne’e.

Tanba ne’e, Prezidenti Parlamentu Nasional baixa fali proposta Orsamentu Retifikativu ne’e ba Komisaun C ho karakter normal.

“Entaun iha tempu loron 10 atu Komisaun C haree Orsamentu Retifikativu ne’e. bainhira tempu loron 10 ne’e liu tiha mak foin komisaun C halo ajendamentu ba plenária atu hetan aprovasaun. Kuandu Orsamentu Retifikativu ne’e lahetan diskusaun iha komisaun C, entaun Orsamentu Retifikativu ne’e aprezenta de’it ba plenária,” informa Maria Teresa.

Alen ne’e, Portavoz Parlamentu Nasional, Lidia Norberta, hateten, iha informasaun katak, Governu mós atu aprezenta programa ba daruak mai Parlamentu Nasional iha tempu badak.

“Karta ne’ebé ami simu, Governu informa katak, iha tempu badak, Governu sei lori fali programa mai Parlamentu Nasional,” informa Lidia Norberta

Nia haktuir, Governu sei lori fali programa ba daruak, tanba durante ne’e bankada opozisaun sempre hateten katak, programa Governu nian mak tenki mai uluk hafoin orsamentu.

Maibe iha realidade VII Governu minoritariu la hatama programa ba daruak iha PN, maibe hatama uluk fali mak Orsamentu Retikativu. Tamba ne’e, implika BOAMP halo mosaun sensura hasoru Governu tamba programa daruak nian seidauk tama PN.

Aprezentasaun programa VII Governu minoritariu nian ba dahuluk iha loron 16 fulan Outubru liu ba, BOAMP rejeita ho mosaun rejeisaun, tanba konsidera programa ne’e laiha dadus kompletu, no planu detallada. cos

GMN | Grupo Media Nacional