Jornalista 216 Sei Hetan Karteira profisionál

DILI, (TATOLI) - Jornalista Timoroan sira hosi mídia imprime, eletrónika no online hamutuk Nain 216 sei hetan karteira profisionál hosi Conselho Imprensa Timor-Leste (CI-TL) iha loron, 20 Dezembru (Fulan ida ne’e).

Prezidente Konsellu Imprensa (CI-sigla Portugés), Virgílio Guterres informa, atribuisaun karteira profisionál ba jornalista Nain 216 tanba sira hotu servisu liu tinan lima ona.

“Iha 20 Dezembru, KI halo serimónia atribuisaun karteira profisionál ba jornalista sira, lei fó injesaun katak sira ne’ebé servisu ona to’o ona tinan lima ba leten sira bele hetan karteira profisionál no la liu hosi estájiu,” Prezidente CI, Virgílio da Silva Guterres ba jornalista sira iha Palásiu Governu hafoin hala’o sorumutu ho Primeiru Ministru, Mari Alkatiri, Segunda (3/12).

“Husu maluk sira atu uza karteira profisionál ne’e ho profisionál katak bainhira hetan karteira profisionál, ita nia atitude, ita nia kobertura, ita nia produtu ne’e mós tenke reflete kualidade profisionál ita nian.  Hanesan jornalista, ha’u hanoin Kódigu Étika jornalistiku ne’e, mak sai hanesan padraun ba jornalista hotu-hotu ne’ebé ré-koñesidu hanesan profisionál atu hala’o sira nia produtu jornalístika bazeia ba Kódigu étika Jornalistika ninian,” Prezidente CI fó hanoin tan.

Nia mós husu atu jornalista Timoroan tane-aas nafatin no fó respeitu ba privasidade ema seluk nian bainhira hala’o nia knar.

“Karteira profisionál ne’ebé sei atribui ba jornalista sira nu’udar apresiasaun no rekoñesementu ida ba jornalista sira ninia produtu jornalístatika durante ne’e tranzmite ona hodi hakonu públiku nia direitu ba asesu informasaun,” nia esplika objetivu atribuisaun karteira.

Entretantu Prezidente Bankada Fretilín, Francisco Branco reforsa katak média iha Timor-Leste mós iha prosesu konsolidasaun no instituisaun Estadu sira, entaun presiza aprende no servisu di’ak.

“Ita foin ukun-an tinan 15 katak ita labele halo milagre hodi sai di’ak no boot derrepente de’it maibé presiza tempu,” Branco enkoraja hodi rekoñese katak Média nia kontribuisaun ba prosesu polítiku no dezenvolvimentu importante tebes atu bele kumpre prinsípiu neutralidade eh imparsialidade no seluk tan.

Jornalista: Zezito Silva | Editór: Manuel Pinto

Foto: Prezidente Konsellu Imprensa, Virgilio Guterres bainhira ko'alia iha seminar internasional, ohin iha Delta Nova. Foto Tatoli/Antonio Goncalves