Kestiona Imparsialidade Mídia, PM Bolu Atensaun CI

DILI, (TATOLI) – Primeiru Ministru Sétimu Governu Konstitusionál, Mari Alkatiri bolu atensaun ba Conselho Imprensa (CI) atu tau matan ba mídia sira. Tuir Mari Alkatiri iha mídia balun mak agora nia kobertura inkilina liu ba Partidu nia interese.

“Preokupasaun Xefe Governu, Mari Alkatiri nian mak politizasaun órgaun komunikasaun sosiál nian ba kobertura ho tendénsia atu inkilina liu ba partidu polítiku eh forsa polítika balun hodi la fó balansu informasaun ba públiku,” Prezidente CI, Virgílio Guterres konta tuir Primeiru Ministru Alkatiri nian deskonfiansa ba jornalista sira hafoin ramata enkontru ho xefe governu iha Palásiu Governu, ohin.

Virgílio dehan, Xefe governu preokupa tebes ho kondisaun órgaun komunikasaun sosiál balun nia kobertura tendensiozu atu inkilina ba forsa polítika balun. Tanba ne’e, Alkatiri husu CI atu tau matan ba asuntu refere.

Aleinde de ida ne’e, PM Alkatiri mós, tuir Prezidente CI preokupa kona ba maneira hakerek jornalista nian.

“Jornalista sira ne’ebé hakerek notísia ho dalen Tetun, enkuantu polítiku sira halo espresaun asuntu ruma barak liu uzu lian Portugés maibé sira la buka hatene palavra portugés ninia signifikadu hodi koloka atu públiku bele komprende fasil,”  Virgílio konta tuir tan.

Iha soru mutu ne’e Prezidente CI, informa mós ba Xefe governu katak durante ne’e CI informa hela de’it ba mídia sira kona-bá regras ou legálidade ne’ebé mídia tenke obese hanesan mídia professional, liu hosi departamentu análize no peskiza CI nian, tanba sempre halo monitorizasaun no tau matan ba servisu órgaun komunikasaun sosiál nian iha Timor-Leste atu jornalista sira bele servisu di’ak liu tan.

Entretantu entre mídia sira ne’ebé mak eziste iha Timor-Leste hanesan Radio Televisao Maubere (RTM) tuir pájina Facebook ofisial https://web.facebook.com/pg/radiotelevisaomaubere/about/?ref=page_internal esplika katak Radio Televisao Maubere mak laloran ida rohan laek ne’ebé haklaken mensajen prinsipál FRETILIN nian ba Maubere no Buibere sira tomak.

Aleinde de Radio Televisao Maubere haklaken ba pás no dezenvolvimentu nasionál, Radio Televisao Maubere, lian ida ne’ebé hamutuk nafatin dezde tempu rezisténsia to’o ohin loron ba libertasaun nasionál.

RTM antenna ida ne’ebé hato’o mensajen Liberdade no demokrasia. Agora daudaun RTM kobre Munisípiu sira hanesan, Dili – FM 99.9 MHz,  Baukau – FM 96.0 MHz, Likisá – FM 97.9 MHz, Manatuto – FM 93.8 MHz, Ainaro – FM 97.9 MHz. Iha Maubisi, Same no Aileu hetan parte balun.

Enkuantu Radio Televizaun Timor-Leste (RTTL) nia estatutu regula iha dekretu lei no 42/2008, de 26 de Novembru nia ezisténsia nu’udar Empreza públiku (bele haree : http://timor-leste.gov.tl/wp-content/uploads/2010/0 /DL_2008_42_Transforma_Radio_Televisao_Empresa_Publica_12.pdf

Grupu mídia nasionál (GMN) ho canal  TV no Radio ho frekuénsia FM 101.1 inklui jornál nasionál diáriu ho semanál rezistadu nu’udar mídia professional, inklui mídia imprime sira hanesan; Jornál Timor-Post, STL, Independent, Timor-Roman, nsst.. hotu-hotu rejistu hanesan mídia Professional ne’ebé defaktu hetan konsiderasaun hosi Consellu Imprensa Timor-Leste.

Jornalista: Zezito Silva | Editór: Manuel Pinto

Foto: Primeiru-Ministru, Marí Alkatiri, ko'alia ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidente Nicolau Lobato Bairo Pité, ohin. Foto mídia PR