Portugés Komete Krime Iha TL, Ikus Mai Halai Lakon

DILI, (TATOLI) - Prokuradór Jerál da Repúblika (PJR) José Ximenes ohin hasoru malu ho Prezidente da Repúblika hodi informa ba Prezidente, Francisco Guterres Lú Olo, kona-ba kazu sidadaun portugés na’in rua, Tiago Guerra ho nia espoza ne’ebé halai hosi responsabilidade hafoin halo krime iha Timor-Leste (TL).

Tiagu Guerra ho nia kaben tuir desizaun Tribunál Primeira instánsia Timor nian, sira Nain rua hetan pena prizaun tinan ualu iha Timor-Leste.

Arguidu Tiagu Guerra ho nia fen Chang Fong Guerra halai tanba deskonfia embaixada Portugal Fasilita Pasaporte ba Arguidu sira hodi sira nain rua halai hosi Dili sa’e ró ki’ik ida iha suku Betanu, munisípiu Manufahi no bainhira to’o iha Darwin, Austrália, polísia Austrália ka’er kedas sira, tanba tama ba territóriu Austrália ho illegalmente, iha loron Kinta, 9 Novembru 2017.

Tiagu Guerra ho nia fen Chang Fong Guerra komete kazu iha Timor-Leste ho numiro prosesu ba kazu brankeamentu kapitais rejistadu iha Prokuradór Distritál Dili ho mak Númeru Unidade Crime (NUC 0511/14.PDDIL) no hetan ona kondenasaun iha primeira instánsia iha Agostu 2017, maibé sira sei rekorre (halo rekursu) ba Tribunal Rekursu.

Iha desizaun primeira instánsia kondena sira tinan 8 tama prizaun iha Agostu liubá, maibé depois sira halo rekursu ba Tribunal Rekursu, maibé antes ne’e arguidu na’in rua ne’e tama ona iha prizaun preventiva, maibé depois sira halo pedidu rekorre ba Tribunal Rekursu no Tribunal Rekursu altere tiha medida koasaun ne’e tau ba iha provizaun de auzénsia (bandu atu labele sai hosi territóriu Timor – Leste) nian, ho konsekuénsia mós prende sira nia pasaporte.

Basa desizaun koletivu Tribunál Distritál Dili hatún pena tinan ualu (8) tama prizaun ba Tiago Guerra no nia-kaben Tammy Guerra, inklui selu indenizasaun ba Estadu ho valór $859.000.

Bazeia ba akuzasaun Ministériu Públiku ba arguidu Tiago Guerra no Tammy Guerra ho krime tolu, ida mak, bazeia ba artigu 295 kona-ba krime pekulatu, artigu 303 kona-ba krime falsifikasaun dokumentu no artigu 313 (a), (b) no (c) kona-ba krime Brankeamentu kapitál hosi Kódigu Penál. Maibé ikus mai desizaun Tribunál primeira instánsia absolve tiha krime rua seluk hodi kondena de’it ho krime pekulatu.

“Polísia Federál Austrália konsege detein ema na’in rua pelumenus semana rua. Maibé, hafoin Autoridade Sentrál Austrália halo análize profundu, sira hateten katak sira nia regra doméstika labele fó fatin atu estradita mai Timor, entaun halo fila fali karta no ikus mai sira autoriza sai ba Portugal,” José Ximenes hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, Segunda, (3/12).

José hatutan, PJR utiliza International Police (INTERPOL) atu lori hikas sidadaun Portugés na’in rua mai Timor, infelizmente, la hetan solusaun.

“Halo mós kontaktu ona Prokuradoria Jerál Portugal para haree posibilidade,” José haktuir tan.

Jornalista: Xisto Freitas | Editór: Manuel Pinto

Foto: Prokuradór Jerál Repúblika, José Ximenes. Foto mídia PR