Governu Sei Ajusta Asuntu Espesífiku ba Konstrusaun Portu Tibar Bay

DILI, (TATOLI) – Primeiru-Ministru (PM), Marí Alkatiri, hamutuk ho ekipa téknika husi ministériu kompetente, ohin halo hela ajustamentu ba asuntu espesífiku konstrusaun Portu Tibar Bay atu bele aselera servisu kontrusaun.

“Ohin ami ajusta hela konaba konstrusaun no dezeñu, enkuantu kontratór prinsipál agora dadauk sei halo prosesu aprovizionamentu ba avaliasaun kontratór internasionál ne’ebé kontratór prinsipál mak sei kontrata sub kontratór ida para mai halo konstrusaun infraestrutura”, tenik Vise-Ministru Obras Públikas, Transporte no Komunikasaun, Inácio Moreira, ba jornalista sira hafoun enkontru ho PM iha Palásiu Governu, ohin.

Governante ne’e informa tempu ne’ebé planeadu hotu to’o loron 7 dezembru presiza iha ona desizaun ruma, maibé tanba asuntu tékniku, kontratór prinsipál husu atu estende tan fulan neen ka loron 180, husi parte tékniku konkorda maibé PM sei halo análize hodi foti desizaun.

Informa tan, ohin diskute kle’an mós konaba estudu ambientál ba konstrusaun portu no relatóriu husi ekipa téknika halo hotu ona, maibé PM sei análiza.

Bainhira portu ne’e remata sei hahú halo operasaun ba kargu, deskarregamentu no karegamentu kontentór sira ne’ebé tama sai. Enkuantu estrada ne’ebé liga ba movimentu hotu-hotu iha portu nia oin presiza halo rotunda atu bele movimentasaun kontentór sira la’o seguru.

Ministru hatutan dadaun iha hela prosesu aprovizionamentu ba sub kontratór sira no data limite iha fulan-dezembru tinan ne’e no kontratór prisinpál sei asina kontratu ho sub kontratór atu hahú, maibé hotu-hotu tenke hein dezisaun no lisensa ba impaktu ambientál.

Entretantu kontratór prinsipál ne’ebé kaer konstrusaun Portu Tibar Bay mak kompañia Bollaré husi França ho durasaun servisu tinan tolu nia laran, hahú 2018 to’o 2020 no fulan-juñu 2017 liuba Governu hamutuk ho kompañia prinsipál ne’e lansa ona fatuk dahuluk ba projetu ne’e.

Kompañia Bollaré asina projetu konstusaun Portu Tibar Bay iha tinan kotuk ho totál orsamentu milliaun US$490, kompostu husi orsamentu orijen husi kompañia Bollaré ho montante US$360 no osan garantia husi Governu ne’ebé tau iha banku Singapura hamutuk ho montante US$130 hodi hahú prosesu konstrusaun. Portu Tibar Bay sei okupa rai éktare 27 ho metru 630.

Jornalista: Julia Chatarina | Editora: Rita Almeida

Foto: Reprezentante Kompañia Bollaré Ports hosi França, Eric Mancini ho nia ekipa, ohin aprezenta dezeñu portu Tibar ba Primeiru Ministru, Marí Alkatiri iha Palásiu Governu. Foto dokumentasaun GPM.