domingo, 6 de maio de 2018

Afonso Dhlakama: Hipotéze ida hosi moris ida rezisténsia nian

PARTILHAR

Afonso Dhlakama, ne'ebé mate iha loron-kinta, ho tinan 65, tanba moras, bolu nia aan rasik hanesan "aman demokrasia nian", iha nia moris tomak halo rezisténsia armadu hasoru rival Frente de Libertação de Moçambique (Frelimo), ne'ebé agora iha poder.

Afonso Macacho Marceta Dhlakama, líder hosi Rezisténsia Nasional Mosambikanu (Renamo), moris iha loron 01 Janeiru 1953, iha Mangunde, distritu Chibabava, iha Sofala. Oan-mane hosi líder tradisional ida, régulu Mangunde.

Afonso Dhlakama kaer lideransa Renamo nian ho tinan 26, hodi troka André Matsangaíssa hodi kontinua ho guerilla ne'ebé maka nia asumi hanesan frente rezisténsia hasoru sistema komunista ne'ebé maka harii hosi Frelimo iha Mosambike, hafoin independénsia, iha tinan 1975.

Dalabarak, konsege hadook-aan, dalaruma ho motor - ne'ebé nia gosta uza, hosi serku forsa governamental sira durante funu sivil durante tinan 16, to'o sai hanesan interlokutor hosi partidu nian iha poder iha negosiasaun sira ne'ebé hamosu asinatura ba Akordu Jeral Dame nian iha Roma, iha tinan 1992.

Hafoin funu sivil hotu, Afonso Dhlakama sai hanesan kandidatu hosi Renamo ba eleisaun prezidensial lima, ne'ebé hala'o ona hamutuk ho lejislativu sira, no nia ho nia partidu lakon iha eleisaun sira ne'e: 1994, 1999, 2004, 2009 ho 2014.
Nia la rekoñese lakon iha eleisaun sira ne'e no ameasa fila ba luta armada.

Halo beibeik nia diskursu ho ameasa sira hodi halo fali funu, iha tinan 2012 nia fila ba ai-laran Gorongosa, distritu ne'ebé simu ona baze prinsipal sira Renamo nian, diriji konfrontu sira entre frente armadu partidu nian ho Forsa sira Defeza ho Seguransa mosambikanu nian.

Hosi konfrontu sira ne'e, Afonso Dhlakama asina ona Akordu hodi Hapara Opozisaun Militar sira ho Armando Guebuza, iha tempu ne'ebé nu'udar Prezidente Repúblika ne'ebé maka hamosu eleisaun jeral dalima iha tinan 2014.

Hafoin lakon prezidensial iha tinan 2015, hasoru Filipe Nyusi, hosi Frelimo, nia organiza ona komísiu sira ne'ebé ameasa governa iha provínsia sira hosi sentru no norte nasaun nian ne'ebé maka hetan maioria votu.

Iha tinan ne'ebá, nia komitiva hetan atake armadu rua ne'ebé maka nunka asumi, no sai lahó kanek no lakon iha ai-laran sira iha sentru nasaun nian ne'ebé hafoin ne'e mosu fali iha sidade Beira, kapital hosi provínsia Sofala.

Hafoin invazaun ida ba nia uma iha Beira, Afonso Dhlakama lakon no refujia fali iha Serra Gorongosa, hamosu fali siklu ida violénsia militar nian ho Forsa sira Defeza ho Seguransa, to'o deklarasaun suspensaun nian iha fulan-Dezembru 2017, ne'ebé maka dura to'o ohin loron.

Líder Renamo nian hetan ona entendimentu ho Prezidente mosambikanu, Filipe Nyusi, ba submisaun ba Asembleia Repúblika hosi proposta ida revizaun pontual hosi Konstituisaun Repúblika nian hodi aprofunda desentralizasaun.

Afonso Dhlakama aprezenta desentralizasaun hanesan fundamental ba dame naruk ida iha Mosambike.

Iha parte ikus hosi konferénsia imprensa nian, Afonso Dhlakama kumprimenta ona, ho hamnasa, jornalista ida-idak, bolu "belun", maski nunka haree antes sira, husik nune'e imajen di'ak ida ba polítiku ida ne'ebé, dalabarak provoka iha nia deklarasaun sira no iha pozisaun públiku sira.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: