ASDT Deklara Reforsa FRETILIN iha Eleisaun Antesipada

DÍLI, (TATOLI) - Associação Social Democrática Timor-Leste (ASDT) deside fó nia votus konfiansa ba Partidu Fretilín iha eleisaun antisipada, enkuantu ba eleisaun tinan ida ne’e ASDT la bele partisipa, tanba ne’e deside apoiu Fretilín, tanba ASDT uluk mak transforma sai Fretilín.

Koordenadór ASDT ida, José Martinho informa katak ASDT deklara apoiu FRETILIN tanba istorikamente FRETILIN transforma husi ASDT, nune’e iha identidade ne’ebé mak hanesan, tan ne’e hakarak apoiu FRETILIN.

“Fiar katak ho apoiu ASDT, FRETILIN sei kaer ukun,” espera José Martinho, iha rezidénsia Proklamadór Francisco Xavier do Amaral, Bidau-Lecidere, segunda ne’e.

Jose husu ba estrutura, militante, simpatizante ASDT iha territóriu Timor-Leste, husi rai ulun to’o rai ikun, inklui Oe-cusse, hamutuk vota ba númeru haat hodi fó vitória ba FRETILIN, tan tuir nia FRETILIN idéntiku mós hanesan ASDT.

Razaun ASDT deklara reforsa FRETILIN hodi manan Eleisaun Antisipada tanba ho FRETILIN mak sei akontese “konfesa no komunga”. Signifika Fretilín nia ukun mak sei kombate korrupsaun.

“Se mak han sentavu lima ba, prizaun Becora no seluk tan. Ho FRETILIN mak korrupsaun ne’e menus iha ita-nia rain. Se lae, osan ne’e debate barak iha Parlamentu, maibé ba fali rai li’ur povu sai nafatin vítima ba dezenvolvimentu. Tempu to’o ona, hakilar, sasán ne’ebé loos. Labele bosok malu tan kadeira,” salienta koordenadór José Martinho.

Sekretáriu Jerál Partidu FRETILIN, Mari Alkatiri hateten katak ASDT ho FRETILIN hamutuk sei implementa justisa. Katak, justisa ne’ebé sei kore povu husi mukit no ki’ak, justisa ida ne’ebé bele mai ho dezenvolvimentu ekonómiku ba iha ita-nia rain.

ASDT/FRETILIN hahú 1974 no 1975 proklama independénsia Repúblika Demokrátika Timor-Leste (RDTL) no prezidente rasik Francisco Xavier do Amaral, iha 28 novembru.

Fundadór RDTL barak mak mate ona fó aan ba luta ida ne’e, ikus mai proklamadór RDTL mós husik ita. Husik ita iha tempu ne’ebé ASDT sei presiza nafatin nia, ASDT, FRETILIN sei presiza nafatin nia.

Tanba ne’e iha tempu hirak ne’e, fundadór sira idaidak buka dalan idaidak hodi haburas demokrasia iha Timor-Leste.

Atu haburas demokrasia, idaidak, balun sai independente no iha partidu foun, maibé ikus fali mai haree katak ita fahe malu, ne’e erru ida. Nune’e, rai ne’e la ba oin.

Tanba ne’e agora FRETILIN dehan oras to’o ona. Labele hein tan. Timor-Leste labele hein tan ona. Oras to’o ona. Katak, oras to’o ona atu hadi’a sistema edukasaun, sistema saúde; edukasaun ho saúde ida di’ak liu hodi bele servi ita-nia povu rai ida ne’e.

Oras to’o ona atu hadi’a sistema bee moos, atu ita-nia povu kain ida bele simu bee idaidak iha nia uma ba sira-nia nesesidade rasik.

Oras to’o ona atu programa harii uma ba povu ba komunidade iha área rurál, iha área urbana mós. Oras to’o ona atu dezenvolve agrikultura, atu dezenvolve peska. Oras to’o ona atu hadi’a ita-nia ekonomia tomak.

Oras to’o ona atu hadi’a infra-estrutura tomak, labele kontinua de’it halo Estrada ohin, fulan tolu de’it tenke halo foun fali. Tenke hadi’a ho kualidade. “Buat sira ne’e hotu mak ita dehan oras to’o ona,” esplika sekretáriu Jerál Marí Alkatiri.

Nia reforsa, oras to’o ona atu Timor-Leste ne’e hateke ba oin, ho programa dezenvolvimentu ida loloos atu servi povu ida ne’e. Labele de’it ita hakbesik aan ba povu bainhira ita presiza povu nia votu.

“Ita tenke serbisu hamutuk ho povu lorloron, semana-semana, fulan-fulan, tinan-tinan, tinan ba tinan para hadi’a povu nia vida,” apela Marí Alkatiri.

Tanba ne’e, nia hateten katak, loron ne’e importante ba ita hotu, bainhira ASDT deside atu vota ba FRETILIN, katak ASDT ho FRETILIN ida de’it.

Nia mós relembra katak bainhira iha 2001, bainhira iha eleisaun ba Asembleia Konstituiante, ASDT ba hanesan partidu ida, FRETILIN ba hanesan partidu ida.

Bainhira FRETILIN manan iha eleisaun ida ne’e (2001) ho kadeira 55, ASDT ho kadeira neen, FRETILIN presiza tan na’in neen atu aprova konstituisaunm iha tempu ne’ebá duni, prezidente Francisco do Amaral hateten katak nia deputadu na’in neen ne’e FRETILIN nian.

“Ne’e hatudu katak iha tempu ne’ebé loloos ita sempre hamutuk, atu lori rai ida ne’e ba oin, ita sempre hamutuk. Ne’ebé, ha’u sempre dehan fó nafatin konfiansa mai ita,”

Marí akresenta, hanesan mós fundadór no sira seluk, enkuantu nia sei moris, buka atu hametin unidade nasionál.

“Ita buka demokrasia, estabilidade; lakohi tan violénsia ona ida ne’e. Ita buka atu hamutuk kaer ba ita-nia kultura, ita-nia tradisaun para hametin ita-nia ekonomia. Ne’e mak ita buka,” hateten Alkatiri.

Nia reforsa katak ita-nia lulik fó forsa nafatin mai ita, foho lulik, fatuk lulik, mota lulik sira sei fó nafatin forsa mai ita. Ita-nia matebian sira, eroi sira ne’ebé husik ita ona, fó nafatin forsa nafatin mai ita.

“Ho sira-nia forsa, ho sira-nia kbiit, 12 maiu, ita sei manan,” salienta sekretáriu Jerál FRETILIN, Marí Alkatiri.

“12 maiu vota ba FRETILIN hanesan vota ba referendum foun ida. Referendum hodi kore povu husi mukit, kore povu husi ki’ak,” nia konklui.

Jornalista: Rafy Belo | Editór: Manuel Pinto