terça-feira, 8 de maio de 2018

Fretilin lakohi komenta saida maka hanesan "provokasaun" hosi opozisaun AMP

PARTILHAR

Iha loron-segunda ne'e, sekretáriu-jeral Fretilin nian lakohi hatán ba saida maka nia konsidera hanesan "provokasaun" hosi koligasaun opozisaun nian, ne'ebé aponta ba iregularidade sira kona-ba preparasaun ba eleisaun antesipadu sira iha loron-sábadu iha Timor-Leste.

"Ha'u laiha komentáriu atu halo kona-ba akuzasaun sira ne'ebé laiha baze. Ha'u laiha tempu hodi halo resposta sira ne'e. Hatudu de'it katak sira la senti seguru, bainhira hakarak hetan problema sira ne'ebé la ezisti", Mari Alkatiri afirma iha konferénsia imprensa.

"Ami hein de'it. Iha órgaun kompotente sira hodi rezolve ilegalidade sira ne'e", nia hatete ba jornalista sira.

Durante kampaña ba lejislativu loron 12 Maiu ne'e, Aliansa Mudansa ba Progresu (AMP) - koligasaun ne'ebé lidera hosi Xanana Gusmão ne'ebé halibur forsa opozisaun tolu - halo beibeik "alerta sira" kona-ba saida maka sira hatete hanesan manipulasaun ba prosesu eleitoral.

Alerta foun liu maka kona-ba marka sira tinta nian ne'ebé maka iha boletin votu balun ne'ebé maka impresu no lori ona ba rejiaun Kovalima, iha zona osidental nasaun nian.

Iha nia pájina Internet, AMP sujete katak ne'e hanesan tentativa ida manipulasaun ba votu nian.

Mari Alkatiri lakohi halo mós komentáriu kona-ba relatu sira hosi alegadu atake sira ne'ebé halo hasoru militante sira AMP nian ne'ebé koligasaun hatete katak halo iha loron hirak ikus ne'e iha fatin rua iha leste nasaun nian.

"Ha'u la hatán ba provokasaun sira. Polísia investiga hela kazu sira. Bainhira iha violasaun ba lei sira, autoridade sira sei halo atuasuan", nia konsidera.

Mari Alkatiri ko'alia iha konferénsia imprensa iha sede hosi Komité Sentral hosi Frente Revolucionária do Timor-Leste Independente (Fretilin), iha Díli, bainhira hahú loron ikus sira kampaña nian ba eleisaun lejislativu antesipadu iha loron-sábadu.

Iha konferénsia imprensa partisipa mós José Ramos-Horta, atual ministru Estadu, ho Abílio Araújo, sira na'in rua hanesan fundador sira Fretilin nian.

José Ramos-Horta hatudu hakfodak tanba durante kampaña AMP halo publikasaun oioin iha rede sosial sira ne'ebé hamosu dúvida ba órgaun eleitoral sira, Komisaun Nasional Eleisaun (CNE) ho Sekretariadu Tékniku hosi Administrasaun Eleitoral (STAE) nian.

Ramos-Horta ne'ebé halo kampaña hamutuk ho Fretilin, rekorda katak komunidade internasional halo nafatin "elojiu ba CNE ho STAE" no nia konsidera katak krítika sira la'ós halo hosi líder importante sira koligasaun nian, Xanana Gusmão ho Taur Matan Ruak.

"Karik mai hosi grupu ki'ik ida ne'ebé halo serbisu hosi media ho relasaun públika AMP ne'ebé ladi'ak", nia afirma.

Mari Alkatiri afirma katak Fretilin mantén ona, durante kampaña, postura "pozitivu" ida, dedikadu hodi fó hatene ba eleitoradu kona-ba nia programa no hatete katak partidu haree ona ba nia pasadu no rekoñese asaun "pozitivu ho negativu" ne'ebé maka akontese ona.

"Ami lamenta katak partidu balun la ko'alia kona-ba programa no halo kampaña negativu ida, kampaña provokasaun ida", Mari Alkatiri hatutan.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: