Lider Balun Uza Demokrasia Hodi Ataka Malu

DILI, (TATOLI) - Eis Prezidente Partidu Fretilín, Abílio Araújo observa katak Kampaíña Eleitorál, iha Eleisaun Antisipada (EA) durante ne’e, lider partidu balun aproveita oportunidade hodi ataka malu de’it, duke ko’alia programa polítiku. Enkuantu lider hosi Partidu ne’ebé, fundadór Fretilín ne’e la temi nia naran.

“Ita haree katak iha tinan sanulu nia laran, ikus mai, demokrasia, partidu balun nia lideransa balun uza atu ataka malu. Nune’e ami sira (fundadór) tuur hamutuk hateten ba malu, ita labele simu atake, liafuan sira, sira seluk halo kontra ita,” Abílio Araújo, konta tuir iha rezidénsia proklamadór Francisco Xavier do Amaral, Bidau-Lecidere, foin lalais ne’e.

Abílio haktuir sira halibur malu iha FRETILIN (Frente Revolusionáriu de Timor-Leste Independente) halo kompromisu,  hodi aprezenta de’it programa iha kampaña no rejeita hodi halo no hatán insulta sira husi adversáriu polítiku sira.

“Ita ko’alia ita-nia programa, ita ko’alia buat sira ne’ebé ita hakarak halo no buat ne’ebé ita hatene no sente katak la loos, ita ko’alia. Ita ko’alia loos, ita ko’alia moos. Ida ne’e mak kampaña ne’ebé ita agora halo,” informa Abílio Araújo.

Iha 1983, FRETILIN deside ona katak kuandu Timor-Leste (TL) ukun rasik aan sei kria kondisaun atu harii sistema demokrátiku atu harii demokrasia iha ita-nia rain.

FRETILIN lakohi karik, ohin loron la iha partidu polítiku sira. Iha de’it mak ASDT/FRETILIN, partidu ida de’it, atu ukun ita-nia rain. Ne’e realidade.

Tanba ida ne’e duni, tuir nia, fundadór sira balun, antes ne’e ba iha partidu sira seluk, atu halo demokrasia ne’e moris, demokrasia ne’e forte.

Iha 2002, nia hasoru malu ho saudozu Proklamadór Francisco Xavier do Amaral, iha nia rezidénsia, Bidau-Lecidere, saudozu hateten katak saudozu kandidata aan ba prezidente repúblika, tan haree katak eis-lider rezisténsia Kay Rala Xanana Gusmão mesak mak aprezenta nia kandidatura.

Nune’e mós, mezmu nia hatene katak kandidatura ne’ebé forte hodi sai nu’udar xefe estadu iha tempu ne’ebá mak eis-lider rezisténsia Xanana Gusmão, maibé nia mós kandidata aan tanba hakarak haburas no fó signifikasaun ba demokrasia. Se lae, liafuan demokrasia ne’e la forte.

“Ne’e ezemplu ida, atu hatudu katak demokrasia ne’e ita mak harii, ita mak deside, ita mak kria lei, konstituisaun 2002 ita aprova ne’e, mak fó fatin ba hamosu sistema demokrátiku,” hateten fundadór Abílio Araújo.

Jornalista: Rafy Belo | Editór : Manuel Pinto

Imajen: Sekretariu Jeral Partidu Fretilin Mari Alkatiri akompanha husi Abilio Araujo wainhira halao kampanha Eleisaun Antisipada Parlamentar iha Distritu Aileu, Domingu 15 Abril 2018.FOTO TATOLI