terça-feira, 8 de maio de 2018

Polísia Detein Ona Suspeitu Kazu Makadiki

PARTILHAR

DILI, (TATOLI) - Komandante Jerál Polísia Nasionál Timor-Leste (PNTL), Komisáriu Júlio da Costa Hornay hateten suspeitu hamutuk na’in lima polísia detein ona relasiona ba kazu tuda kanek militante Aliansa Mudansa ba Progresu (AMP) iha Makadiki, Uatulari, Munisípiu Viqueque, iha loron 5 Maiu, hafoin kampaña AMP iha Viqueque Vila.

Lider  másimu PNTL hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin relata pontu situasaun seguransa ba Prezidente Repúblika, Francisco Guterres Lú Olo.

Hornay esplika deskonfia militante hosi partidu FRETILIN maka halo asaun tuda militante AMP hirak ne’e.

Iha kazu ne’e, nia dehan, polísia la’ós kaptura de’it ema ne’ebé deskonfia suspeitu maibé kaptura mós vítima no sasin para bele presta deklarasaun kona-ba kronolojia hosi akontesimentu.

Nia tenik Polísia Eskuadra Postu Administrativu Uatulari maka atende hela kazu refere.

Kona-ba kazu tuda kanek aman no oan iha Lospalos, loron 6 Maiu, Komandante Jerál PNTL informa, polísia kaptura ona suspeitu hodi sulan iha sela Polísia Munisípiu Lautém hodi investiga.

Nia haktuir suspeitu ne’e hemu tua lanu depois tama ba iha uma laran hodi hakanek vítima sira.

Entretantu, nia dehan, vítima sira oras ne’e hala’o hela tratamentu saúde iha Ospitál Referral Baukau no vítima sira nia kondisaun hahú di’ak ona.

Iha biban ne’e, Komisáriu Júlio Hornay afirma polísia sei bandu militante partidu sira halo pawai hale’u sidade hafoin kampaña ramata, liu-liu kampaña ne’ebé halo iha kapitál Dili iha loron 8-9 Maiu.

Maneira ida ne’e, tuir Hornay, atu evita asidente tráfegu, insidente ka konfrontasaun fíziku entre militante partidu sira.

Nia mós kontinua apela ba populasaun no militante partidu polítiku sira atu mantein pás no estabilidade durante kampaña ne’e la’o.

Jornalista: Xisto Freitas | Editór: Manuel Pinto

Imajen: Komandante PNTL, Komisáriu Júlio Hornay, fó intervista ba jornalista sira iha edifísiu PJR Kolmera, ohin. Foto Tatoli/Egas Cristovão
PARTILHAR

Author: verified_user

Publicação luso-timorense sem fins lucrativos

0 comentários: