Baku Labarik Oekusi, KDL Husu MP Hasai Mandadu Kapturasaun

DILI (TATOLI) – Senior project officer ba Komisaun Direitu Labarik (KDL), Cipriano da Costa husu ba Ministériu Públiku (MP) hasai ona mandadu kapturasaun ba autór ne’e to’o oras ne’e nia estatutu deskoñesidu hodi prosesa tuir lei ne’ebé vigor, tanba Polisia Nasionál Timor-Leste (PNTL) halo ona prosesu investigasaun.

Aktu hosi Autór nian halo vítima nia kondisaun grave inklui trauma, maibé tanba atu sustenta moris labarik sira sei kontinua halo negósiu.

“Espera katak Ministériu Públiku bele hasai ona mandadu kapturasaun hodi bele prosesa autór ne’e,” Cipriano da Costa informa ba Ajénsia TATOLI liuhosi telefone, ohin.

Tuir Cipriano da Costa ema deskoñesidu ne’ebé halo agresaun fíziku hasoru labarik sira hosi Rejiaun Autónomu Espesiál Oe-Cusse Ambenu (RAEOA) tanba autór deskoñesidu ne’e la satisfás ho derrota ne’ebé Partidu Fretilín simu iha eleisaun antisipada hosi fatin refere, foin lalais ne’e.

“Iha tuku 16:00 loro kraik, autór ne’e mai hosi Rai-Kotu ho motor no la uza kamiza hodi tolok labarik sira no dehan imi mak halo partidu Fretilín lakon iha Oe-Cusse hafoin baku daudaun labarik.”

“Foti tan ai ida atu baku labarik sira, maibé Tia ida mai hapara no autór ne’e halai tiha.” Cipriano konta tuir. Hodi fó sai tan katak akontesimentu ne’e akontese iha eskola São Miguel nia oin, no labarik ne’ebé mak autór baku fa’an pentolan no mantolun da’an iha eskola nia oin.

Iha parte seluk, Estudante Universitáriu Oe-Cusse ne’ebé iha Dili afirma to’o agora Oe-Cusse oan sira liliu labarik sira barak mak sei ta’uk hodi tun mai Dili tanba ameasa ne’ebé ema halo.

Antes ne’e parte Polisia promete iha tempu badak sei kaptura autór ne’ebé baku labarik na’in haat ne’e, iha Segunda (22/05), oras 4H00. 

Jornalista: Zezito Silva | Editór : Manuel Pinto