Eskola Selegua Aat, Difikulta Prosesu Aprendizajen

DILI, (TATOLI) - Labarik (alunu) sira halimar iha de’it li’ur, uma, la tama eskola. Udan para mak ami tama sala laran.

Informasaun ne’e hato’o husi diretora eskola filiál Selegua, Lúcia da Costa Castro, husi suku Sagadate, Aldeia Onebuu no Selegua, Postu Administrativu Baguia, Munisípiu Baucau, ba Ajénsia TATOLI, via telefone, ohin.

“Horseik ami ba, ohin mós ami ba. Lorloron ami ba eskola, udan para mak ami tama sala laran. Udan nafatin, ami iha li’ur de’it,” informa tan diretora Lúcia da Costa Castro.

Nia informa, durante ne’e hatama ona ba proposta ba estadu, hanesan Ministériu Edukasaun (ME) no ba to’o iha nasionál, to’o oras ne’e ema ida seidauk mai. Eskola ne’e harii ho projetu pakote referendum 2009 nian.

“Autoridade lokál sira atu hadi’a, maibé agora sei udan, udan mós tau nafatin, ne’ebé sira sei preokupa natar ho to’os ne’e mak seidauk rezolve ne’e,” akresenta ezekutiva eskola filiál Selegua ne’e.

Profile Eskola Selegua

Eskola Filiál Selegua, tuir komunikadu husi Suku Sagadate, TATOLI asesu antes ne’e katak ekola ne’e  nia baze husi eskola Filiál Buawa Lavateri, postu administrativu Baguia, ne’ebé komunidade husi Aldeia tolu Selegua, Onebu’u no Lalulai sorin mak husu ba diretór eskola husi eskola ensinu ne’ebé mak mensiona iha leten, iha tinan 2009, atu bele loke tan eskola filiál husi Lavateri ne’e nia baze ida iha Aldeia Selegua Onebu’u no Lalulai nia klaran, hodi instala besik eskola ba iha labarik sira nia hela fatin, tanba labarik sira husi aldeia tolu ne’e nia kuantidade barak.

Antes ne’e, estudante sira ba eskola iha Suku Sagadate-eskola sentru, ne’ebé dook husi estudante sira, la’o kuaze kilometru 7, hakuur mota no sa’e tuun foho mak foin to’o iha eskola ne’e, nune’e kuandu tempu udan estudante sira susar atu ba eskola, tanba distánsia do’ok husi sira.

Nune’e iha tinan 2009 konsege halo konstrusaun ba eskola ne’e to’o remata, hafoin tama iha tinan 2010, konsege uza eskola ne’e, hodi utiliza ba aprendizajen, hahú ho profesór/a na’in tolu, profesora permanente ema ida de’it mak diretora eskola, Lúcia da Costa Castro, Profesór kontratadu ida, ho naran kompletu Celestino Boavida do Rosário no profesora voluntáriu ida ho nia naran kompletu Terezina Gusmão. Profesora ne’e voluntáriu kuaze tempu barak no naruk ona, maibé seidauk hetan kontratu husi edukasaun munisipál no seidauk hetan saláriu ruma.

Eskola refere iha aula tolu, ne’ebé mínimu tebes, laiha eskritóriu ida ba profesór sira, hodi bele rai sasán hanesan livru no deskansa fatin, husi eskola ne’e mós laiha sanitasaun, sintina ba estudante no profesór sira, hodi bele soe fo’er bainhira presiza.

Husi eskola ne’ebé mensiona, mezmu iha aulas tolu de’it, maibé estudante sira hahú husi primeiru ano, to’o quinto ano mak eskola iha ne’ebá, depois sesto ano, mak transfere fali ba iha Eskola Katólika Sagadate (SDK), postu administrativu Laga, mak kontinua fali nia estudu hanesan baibain hodi termina nia estudu iha eskola primária.

Kondisaun husi eskola refere mós, menus fasilidade sira, hanesan aula, meja, kadeira, livru ba labarik sira, inklui fasilidade sira, ne’ebé relasiona ho eskola nia presiza sira seluk. Eskola refere nia estudante mínimu sempre atinje besik 20 pessoas, mak hala’o prosesu estudu iha eskola ne’e. Husi dalan diresaun Munisípiu Baucau ba Postu-Administrativu Baguia, iha dalan boot diresaun Baguia nia, sa’e ba eskola maizmenus 6 Km.

Jornalista: Rafy Belo | Editór: Manuel Pinto

Imajen: Kondisaun eskola filiál Laga Sagadate; Onebuu-Selegua aat ba bebeik husi loron ba loron! Foto FB: Maubere Gusmão