quinta-feira, 24 de maio de 2018

Operasaun hodi buka aviaun Malaysia Airlines ne'ebé lakon iha 2014 hotu iha 29 Maiu

PARTILHAR

Operasaun hodi buka aviaun Malaysia Airliners ne'ebé lakon iha 2014 iha Oseanu Índiku ne'ebé halo hosi empreza norte-amerikanu ida hotu iha loron-tersa oinmai, 29 Maiu, fó sai hosi ministru Transporte malaiu iha loron-kuarta ne'e.

"Operasaun hodi buka halo to'o loron 29 Maiu", hatete hosi Anthony Loke ba jornalista sira.
Ho baze iha akordu ida ho Governu Malázia, empreza privadu Ocean Infinity, ne'ebé hahú ona operasaun foun sira iha fulan-Janeiru, liutiha tinan ida hafoin suspende operasaun ofisial sira hosi autoridade australianu, malaiu ho xineza sira, sei simu de'it osan bainhira hetan aparellu ka kaixa metan.

To'o agora, operasaun sira la permiti hetan buat ida ne'ebé bele kontribui hodi esplika lakon misteriozu hosi aviaun MH370, iha loron 08 Marsu 2014, bainhira halo ligasaun entre Kuala Lumpur ho Pekin ho ema na'in 239 iha aviaun laran.

Ministru hatete katak akordu ho empreza iha validade loron 90, tuir loloos hotu iha fulan-Abril, maibé aumenta ona fulan ida ho pedidu hosi Ocean Infinity.

"Sei laiha tan aumentu. Labele kontinua nafatin. Ami hein to'o loron 29 Maiu no hafoin ne'e ami desidi atu halo oinsá", nia hatete.

Akordu kalkula pagamentu ba dolar millaun 70 bainhira misaun iha susesu iha prazu fulan tolu nia laran. Autoridade sira afirma ona iha momentu ne'ebá katak iha 85% hosi posibilidade hodi hetan aviaun nia rahun iha área foun hodi buka hamutuk 25.000 kilómetru kuadradu ne'ebé defini hosi espesialista sira.

Operasaun ne'e hetan susar tanba laiha transmisaun ruma durante minutu 38 dahuluk semo nian, tanba sistema sira ne'ebé transmiti automátika pozisaun aviaun nian la funsiona, haktuir hosi relatóriu ida iha fulan-Janeiru 2017 hosi autoridade seguransa transporte sira hosi Austrália.

Organizasaun Voice 370, ne'ebé reprezenta família sira hosi ema sira ne'ebé iha aviaun laran, husu iha loron-kuarta ne'e ba Governu hodi haree fali prosesu tomak kona-ba aviaun nia lakon, inklui "posibilidade ba falsifikasaun" ka eliminasaun hosi rejistu manutensaun nian ka omisaun ruma ne'ebé bele prejudika lokalizasaun, operasaun buka nian, salvamentu ka rekuperasaun aparellu nian.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: