DILI, (TATOLI) – Profesór
Filozofia Étika no Polítika Institutu Superior Filozofia no Teolojia (ISFIT)
Don Jaime Goulart Fatumeta, Dili, Pe. Martinho Gusmão, husu Governu
Konstitusionál da-ualu atu kumpre promesa ne’ebé hato’o iha kampaña eleitorál.
“Parabéns ba Governu foun. Ha’u
só dehan deit “quem promete, paga”. Katak, hasai ona lia-fuan iha kampaña agora
tenke halo tuir. Ita hein saida maka sira dehan no saida maka atu halo”, Amu
Martinho hato’o deseju ne’e ba Tatoli iha nia rezidénsia, segunda ne’e.
Nia dehan programa tolu ne’ebé
prioridade ba Governu foun atu rezolve maka edukasaun, saúde no agrikultura.
Iha área edukasaun, Padre haktuir
edukasaun bázika liu-liu aperfesoa (mellora) língua portugés, tetun, aumenta
inglés ho Indonézia, hapara kedas lingua materna ne’ebé aumenta analfabetizmu
intektuál, promosaun ba biblioteka, hakerek livru, hasa’e mestre sira nia
saláriu no hadi’a infraestrutura eskolár.
Amu Martinho hatutan iha área
saúde tenke hadi’a jestaun ospitál nasionál to’o referrál sira, tanba durante
ne’e ospitál la’ós sai fatin ne’ebé atu hadau moris maibé hadau fali mate.
“Saúde ne’e ema dehan fila-fila
ona moras tama ospitál sai mai mate. Ministru foun no vise pelumenus koko atu
ema labele mate barak tan iha ospitál sira”, sujere.
Kona-ba área agrikultura, eis
Pároku Parókia Santu António Manatuto haklaken tenke dezenvolve no reativa
natar sira iha Timor laran, nune’e Timor-Leste bele atinje soberania ai-han.
Nia sujere atu halo manutensaun
didi’ak ba tratór sira ne’ebé Governu uluk fahe ona, nune’e bele haburas
atividade agríkula iha rai laran no mantein mós extensionista sira ne’ebé
Governu tuan forma ona.
Padre Martinho rekomenda atu
ministériu ho natureza “tekniku” ne’e di’ak liu fó ba timoroan sira ne’ebé
kapasitadu ona, ezemplu Ministériu Obras Públikas, Ministériu Agrikultura no
Peskas, Ministériu Edukasaun, Ministériu Saúde no Ministériu Transporte no
Komunikasaun.
Jornalista: Xisto Freitas | Editora:
Rita Almeida
Imajen: Profesór Filozofia Étika
no Polítika Institutu Superior Filozofia no Teolojia Semináriu Menór Fatumeta,
Pe. Martinho Gusmão.
Sem comentários:
Enviar um comentário