segunda-feira, 25 de junho de 2018

AMP Husu PR Lú Olo Respeita Prinsípiu Prezunsaun Inosénsia

PARTILHAR

DILI, (TATOLI) – Primeira Vice Prezidente Parlamentu Nasionál, Maria Angelina Lopes Sarmento informa koligasaun Aliansa Mudansa ba Progresu (AMP) husu atu respeita prinsípiu prezunsaun Inosénsia agora maski Prezidente Repúblika (PR) uza ninia podér konstitusionál atu fiskaliza lista membru governu ne’ebé mak Primeiru-Ministru (PM) aprezenta ona.

“Prezidente Repúblika bele uza ninia podér konstitusionál hodi bele fiskaliza kandidatu sira, maibé nia mós tenke komunga prinsípiu prezunsaun inosénsia nó mós ita nia órgaun soberanu haat ne’ebé mak estadu ne’e iha, hatuur mós separasaun podér maski iha interdependénsia ba malu, maibé kada instituisaun órgaun soberanu ida-idak iha separasaun podér katak, husi órgaun soberanu ida-idak iha interdependénsia ba malu no iha limitasaun atu halo intervensaun ba kada órgaun soberanu”, Angelia esplika ba jornalista sira ohin iha Parlamentu Nasionál (PN).

Tuir Angelina, Artigu 34 Konstituisaun RDTL dehan katak arguidu hotu ne’ebé mak iha prosesu hela, tenke konsidera sira nu’udar prezunsaun inosénsia no bainhira Tribunal sidauk deside ka foti desizaun ruma atu fó sentensa ba kandidatus potensiais ba membru governu, sira ne’e konsideradu inosente.

“A não ser nia julgada ona ka Tribunal hamonu ona sentensa ba nia, ida ne’e ita konsidera nia hanesan ema ne’ebé komete lala’ok ne’ebé kontra estadu mas kuandu sei iha prosesu nia laran, hotu-hotu ita tenke konsidera inosente iha prosesu ida ne’e”, nia esplika.

Angelina afirma, bainhira PR Lú Olo mantein ho ninia pozisaun, presiza hare desizaun ne’e koerente ho PR nia desizaun sira fulan hirak liubá ka lae, tanba iha VII governu konstitusionál liubá PR la kestiona no la uza nia podér konstitusionál atu fiskaliza kandidatu sira ne’ebé mak nomeadu husi PM VII governu konstitusional.

“Iha ministru lubuk ida ne’ebé públiku hatene ona no la’ós segredu katak sira mós iha prosesu nia laran, presta ona deklarasaun ba instituisaun relevantes ho servisu judisiáriu nian, maibé Prezidente Repúblika la uza ninia podér konstitusionál, hetok kontinua fó pose ba sira”, nia kompara.

Hodi husu ba Prezidente Repúblika Lú Olo atu estuda  karta ne’ebé PR simu ona relasiona ho asuntu ne’e, maibé tenke koko atu haree hanesan PR ba ema hotu no haketak tiha lai PR nia kór partidária atu bele hala’o nia podér konstitusionál imparsiál no independente.

Entretantu membru governu sira ne’ebé mak Prezidente Repúblika rejeita mak hanesan Ministru Komérsiu Turizmu Indústria,  Ministru Interior, Ministru Administrasaun Estatál, Ministru Planeamentu Estratéjiku, Ministru Saúde, Ministru Defeza, Ministru Finansas

Vice Ministru Komérsiu Turizmu Indústria, Vice Ministru Estranjeiru no Kooperasaun, ho Vice Ministru Agrikultura.

To’o notísia ne’e tun parte TATOLI seidauk halo konfirmasaun ho Prezidente Repúblika.

Jornalista: Julia Chatarina | Editór: Manuel Pinto

Imajen: Membru Parlamentu Nasional Periodu 2018-2023 halao hela juramentu hafoin hahu plenaria dahuluk.FOTO TATOLI
PARTILHAR

Author: verified_user

Publicação luso-timorense sem fins lucrativos

0 comentários: