Oitavu Governu Sei La Vinga Funsionáriu Tanba Kór Polítika

DILI, (TATOLI) - Ministru Reforma Lejizlativa no Asuntu Parlamentár, Fidelis Magalhães iha loron primeiru hala’o nia funsaun nu’udar governante, ni garante katak oitavu governu ne’ebé lidera hosi Primeiru Ministru, Taur Matan Ruak sei la vinga funsionáriu sira.

Nia husu funsionáriu sira atu hatudu nafatin respeitu no profisionalizmu, funsionáriu lalika preokupa ho rumores sira tanba estadu la koñese kór.

“Lalika preokupa ho rumores sira. Governu ne’e, tama no sai,” garante ministru, Fidelis Magalhães, iha nia diskursu, iha Palásiu Governu, Díli, ohin.

Ba Ministru Fidelis, funsionáriu sira, importante mak hatudu nafatin respeitu no profisionalizmu. Estadu la koñese kór; respeitu mútua entre governu.

Governante ne’e mós sujere ba funsionáriu sira katak lalika preokupa ho rumor sira tanba, Timor-Leste la bandu funsionáriu atu iha opsaun polítika. Rai balun bandu, ita lae.“Ita mai la’ós atu vinga malu,” salienta Fidelis Magalhães.

Ministru Fidelis mós promote katak governu foun ne’e sei lori espíritu foun atu melor kualidade servisu hodi hadi’a povu nia moris.

“Governu sei lori espíritu foun, atu hadi’a, melor kualidade servisu, atu melor liutan ita-nia kualidade povu nian,” garante Ministru Reforma Lejizlativa no Asuntu Parlamentár, Fidelis Magalhães.

Jornalista: Rafy Belo | Editór: Manuel Pinto

Imajen: Ministru Reforma Lejizlativa no Asuntu Parlamentár, Fidelis Magalhães.