Defensor Públiku Jeral, Sergio da
Costa Hornai, deklara, Prezidenti Repúblika (PR), Francisco Guterres ‘Lu-Olo’,
iha kompetensia atu uza nia direitu prerogativa hodi halo fiskalizasaun ba
proposta Primeiru Ministru, Taur Matan Ruak, kona ba membru VIII Governu.
Sergio da Costa Hornai, hateten,
Timor oan hotu tenki respeita servisu Prezidenti Repúblika nian, tanba lei fó
dalan ba Prezidenti Repúblika atu halo fiskalizasaun aspeitu polítika no
jurídika husi proposta Primeiru Ministru nian. Maibé Sergio da Costa Hornai
dehan, konstituisaun RDTL no lei sira mós fó dalan katak, bainhira
ema ruma la satisfas, iha ninia dalan propriu atu hakotu problema ne’e.
“Prezidenti Repúblika mós iha
kompetensia atu uza nia direitu prerogativu atu halo fiskalizasaun ba buat
balu, maibé husi perspetiva polítika no jurídika nian, karik iha
relevansia,”relata Sergio da Costa Hornai, ba jornalista sira iha Parlamentu
Nasional, Sesta (22/06).
Nia haktuir, Timor oan hotu tenki
depozita ba orgaun ezekutivu, hanesan Primeiru Ministru, ne’ebé mak Prezidenti
Repúblika iha atu halo desizaun tuir konviksaun ne’ebé mak Prezidenti Repúblika
halo.
“Nu’udar sidadaun ida, ita hotu
tenki respeita ba Prezidenti Repúblika nia servisu, mai husi ita-nia Governu
rasik hanesan Primeiru Ministru, iha plena poder atu aprezenta proposta ba
lista kandidatu sira,”tenik Sergio Hornai.
Hatan kona ba jurista balun
hateten katak, laiha lei ida ne’ebé fó dalan ba Prezidenti Repúblika atu
rejeita lista ne’ebé Primeiru Ministru aprezenta, Sergio da Costa Hornai
hateten, jurista rua kuandu hasoru malu, nunka iha solusaun.
“Ita hotu tenki respeita, tanba
doutrina no konseitu interpretasaun ba artigu ida ho ninia barealidade, entaun
jurista kuandu barak liu, interpretasaun mós nunka bele hotu. Ita nia
konstituisaun no lei sira mós fó fatin katak, bainhira ema ruma la
satisfas, iha ninia dalan proprio atu to’o iha ne’eba,”katak Sergio.cos
GMN TV | Grupo Média Nacional
Sem comentários:
Enviar um comentário