terça-feira, 24 de julho de 2018

Família Enkontru ho PR Rekolla Restus Mortais Saudozu Camacho


DILI, (TATOLI) - Família saudozu Jaime Camacho Amaral hala’o enkontru ho Prezidente-Repúblika (PR), Francisco Guterres Lú Olo, kona-ba rekollamentu  saudozu nia restus mortais iha fatin haloot temporáriu, Munisípiu Aileu.

“Ami mai hanesan reprezentante família Saudozu Jaime Camacho Amaral ninian, ko’alia ho Prezidente-Repúblika atu informa kona-ba planu família ninian atu rekolla saudozu nia restus mortais hosi fatin hakoi iha Aileu nomós atu simu orientasaun ruma hosi Prezidente-Repúblika, liu-liu relasiona ho rekoñesimentu Estadu ba saudozu nia kontribuisaun ba luta independénsia,” Virgílio Guterres nu’udar alin hosi Saudozu Camacho hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin soru-mutu ho Xefe Estadu.

Nia hatutan bainhira Prezidente-Repúblika fó ona orientasaun ne’ebé klaru, família bele kontinua planu atu konkretiza prosesu rekolla restus mortais tuir tradisaun Timor nian.

“Prezidente husu ona ba ami atu hato’o kalendáriu programa rekollamentu restus mortais. Ami mós tenke halo aprosimasaun ka halo audiénsia ho órgaun Estadu sira seluk ne’ebé relevante hanesan Primeiru-Ministru, Ministériu Defeza tanba saudozu mate hanesan komandante ida hosi FALINTIL, Komisaun Omenájen, Ministériu Solidariedade Sosiál. Planu sira ne’e ami sei tau hamutuk depois sei informa fali ba Prezidente-Repúblika,” Virgílio esplika.

Nia afirma, tinan ida ne’e nia laran sira sei halo rekollamentu ba saudozu Camacho nia restus mortais.

Virgílio esklarese mós katak sira sei ko’alia ho ekipa forénsiku atu ba ke’e restus mortais no tanba hakoi iha Aileu entaun sei koordena ho populasaun no veteranu sira hosi Aileu molok lori mai iha Dili no hafoin to’o Dili sei lori saudozu nia restus mortais ba nia rai moris fatin Venilale, Baucau, atu halo seremónia rituais no hafoin ne’e sei lori hikas mai Dili hodi hetan rekoñonesimentu hosi Estadu molok haloot iha Jardin Eroi Metinaro.

Saudozu Camacho simu xamada hosi komando militár atu mai fó instrusaun militár iha Agustu 1975 hodi mai fó treinu militár ba joven sira atu aprende kaer kilat hodi prepara ba kontra golpe nomós luta ba ukun rasik án.

Saudozu Camacho Amaral sai hanesan Primeiru Komandante Instrusaun Militár no indikadu hosi Komité Sentrál FRETILIN (CCF-sigla portugés) nu’udar Komandante Forsa Parade Militár iha loron Proklamasaun Independénsia iha 28 Novembru 1975.

Iha 28 Novembru 1975 loraik, Saudozu Camacho hatún bandeira Portugal hodi hasa’e fali bandeira RDTL iha fatin Proklamasaun Independénsia, atuál Palásiu Governu.

Bainhira invazaun militár Indonézia tama iha Timor iha 7 Dezembru 1975, saudozu Camacho ho militár sira seluk rekua ba Aileu no saudozu hetan tiru hosi esteilasu bomba hosi ró-ahi militár Indonézia nian no hetan kanek todan depois nia maluk sira evakua nia ba Aileu Vila maibé to’o de’it iha dalan klaran, Quinta Portugal (área Aileu), iha 23 Dezembru 1975, saudozu hakotu iis.

Jornalista: Xisto Freitas | Editór: Manuel Pinto

Imajen: Enkontru entre família Saudozu Camacho ho Prezidente-Repúblika, Francisco Guterres Lú Olo. Imajen Mídia PR.

Sem comentários: