ABAN, PN DISKUTE PROGRAMA VIII GOVERNU

Parlamentu nasionál (PN) V lejislatura sei diskute programa VIII Governu iha semana ne’e, durante loron 3, hahú aban Kuarta loron 25 to’o Sesta loron 27, fulan Jullu, tinan ne’e, relata Vise Prezidente Parlamentu Nasionál, Maria Angelina Sarmento ba jornalista iha PN, Segunda (23/07/2018).

Deputada PLP ne’e informa, Prezidente Parlamentu Nasional sei konvoka enkontru ho líder bankada sira iha sesaun Segunda lorokraik, atu diskute no prepara giaun ba prosesu diskusaun programa VIII Governu ne’ebé sei diskute durante loron 3.

Mais tarde semana ida ne’e Kuarta sei debate ba programa husi VIII Governu konstituisional nian, maibe depende ba desizaun husi konferensia líder bankada sira nian, maibe tuir planu ne’ebé mak prezidente PN sei propoin mak loron 3, hahú Kuarta to’o Sesta semana ne’e,” relata Vise Prezidente PN.

Vise órgaun lejislador ne’e relata tan, hafoin Parlamentu simu programa Governu nian, Prezidente Parlamentu Nasionál (PPN), Arão Noe Amaral, baixa kedas ba komisaun espesializada permanente atu bele halo leitura.

“Programa Governu ami simu ona iha Sesta semana kotuk, Prezidente PN baixa ona ba kada komisaun hodi halo leitura ba programa Governu nian, depois ohin ou aban (horseik ou ohin-red) Prezidente sei konvoka reuniaun líder bankada, atu nune’e bele diskute konaba giaun ba debate programa ne’e, liu hosi líder bankada mak sei aprova prosesu tomak ba debate nian,” haktuir Angelina Sarmento.

Tuir Vise Prezidente PN ne’e, estrutura membru Governu ne’ebé seidauk kompletu, sei la implika ba prosesu aprezentasaun no diskusaun programa Governu nian, tanba Primeiru Ministru eleitu ho membru Governu seluk sei resposabiliza fatin ne’ebé sei mamuk.

“Kondisaun ne’ebé hatete iha konstituisaun mak, depois de loron 30 Governu simu posse, tenke aprezenta programa mai Parlamentu, ida ne’e la implika ba imkompleta ba membru Governu nian, tanba iha aprezentasaun programa Primeiru Ministru mak sei reprezenta Governu halo aprezentasaun ba programa, Membru Governu ne’ebé mak seidauk simu posse, espera iha tempu badak sei simu posse, tanba iha ona díalogu konsensu entre Prezidente Repúblika ho Primeiru Ministru, atu hare konaba lista pendente sira, ejizensia konstituisaun nia mak dentru loron 30 tenke aprezenta programa, tanba ne’e, asuntu membru governu ne’e ita tau ketak tiha lai, agora konsentra lai ba oinsa mak Pimeiru Ministru ho ministru emposadu sira bele mai halo aprezentasaun programa tuir prazu legal ne’eb’e hatúr iha K-RDTL nian” dehan Angelina Sarmento.

Membru Parlamentu Nasionál ne’e garante, Prezidente Repúblika Francisco Guterres Lú-Olo iha tempu badak sei fó posse ba kandidatu membru Governu hirak ne’ebé naran pendente hela.

Hodi nune’e bele implementa kedas programa Governu, bainhira Orsamentu Jeral Estadu tinan 2018 passa iha Parlamentu Nasionál no promulga husi Xefi estadu.

Governu inkompletu,  difikulta servisu

Entretantu, Ministru Reforma Lejizlativa no Asuntus Parlamentares, Fidelis Magalhães, hateten, esturutura VIII Governu la kompletu, difikulta servisu membru Governu sira nian, tanba ministériu balun tenki tutela hela ba ministru balu nia okos.

“Ba kualker Governu, diak liu kuandu kompozisaun kompletu, tanba kuandu kompozisaun Governu la komplentu, difikulta tebes, sa tan agora ne’e membru Governu barak mak seidauk kompletu hodi okupa knaar importante hodi lidera ministériu importante sira,” informa Fidelis Magalhães ba jornalista sira iha Palasiu Governu, Sabadu (21/07).

Nia haktuir, Governu kumpri buat ne’ebé mak Konstituisaun RDTL haruka katak, Governu tenki aprezenta programa iha loron 30 nia laran, hafoin simu posse. Say/cos

GMN TV | Grupo Média Nacional