terça-feira, 24 de julho de 2018

Posibilidade Funsionáriu Simu Osan Tarde

PARTILHAR

DILI: Orsamentu iha tezouru Estadu nian ‘mihis’ tiha ona, ne’e duni funsionáriu públiku sira dala ruma sei simu osan tarde.

Governu aprezenta ona proposta hodi halo transferénsia fundu petrolíferu hodi sustenta ba prosesu servisu mákina Estadu maibé seidauk hetan reajen ruma husi meza Parlamentu Nasionál.

Deputada FRETILIN, Noemia Sequeira hatete, proposta ne’ebé governu aprezenta semana ida ona, maibé Prezidente PN seidauk ajenda.

“Funsionáriu públiku sira oras ne’e daudaun hein hela atu simu osan, maibé ita iha ne’e sei dada malu”, dehan nia iha Uma Fukun PN, Sesta (20/7).

Nia hatutan, atu garantia funsionamentu mákina Estadu presiza garantia funsionáriu sira nia saláriu.

Entretantu, Vise-Ministra Finansas, Sara Lobo hatete, iha fulan Jullu nia laran Ministériu Finansas hasoru obstakulu barak kona-ba finansiamentu publika nian. Tanba ne’e, halo pedidu ba PN atu aprova fundu petrolíferu ho karakter urjénsia hodi responde prosesu ba funsionamentu mákina Estadu nian.

“Ami husu ba parlamentu nasionál atu autoriza hodi halo transferénsia osan husi fundu petrolíferu ho montante tokon $140”, dehan nia.

Osan ho montante tokon $140 ne’e iha fulan Jullu ne’e sei foti uluk tokon $70 hodi selu ba saláriu no vensimentu. Nune'e, halo mós transferénsia públiku atu selu ba veteranu, bolsa da mãe no setór importante sira hanesan edukasaun, saúde, kombustivel ba eletrisidade no seluk tan.

Jacinto Xavier | Independente
PARTILHAR

Author: verified_user

Publicação luso-timorense sem fins lucrativos

0 comentários: