CPLP Asina Deklarasaun Santa Maria

DILI, (TATOLI) – Ministru Negosiu Estranjeiru no Kooperasaun (MNEK), Díonisio Babo Soares, hatete komunidade nasaun sira ne’ebé ko’alia lian-portugés (CPLP-sigla portugés) durante simeira asina deklarasaun Santa Maria iha Cabo Verde.

“Komunidade Uniaun Eropeia sei fó apoiu ba Nasaun sira ne’ebé tama iha PALOP inklui Timor-Leste iha área importante rua, boa governasaun no kulturaʺ, dehan ministro ba jornalista sira iha Aeroporto Nicolau Lobato, ohin.

PALOP hanesan organizaun nasaun sira hosi Afrikanu ne’ebé ho lian-ofisiál portugés mak hanesan Angola, Cabo Verde, Guiné-Bissau, Mozambique, São Tomé e Príncipe.

Babo haktuir deklarasaun sira ne’ebé asina, oinsá promove nafatin lian-portugés, mobilidade populasaun iha nasaun CPLP, apoiu TL rezolve problema tasi Timor, ho esplorasaun mina no gás.

Alende ne’e Uniaun Eropeia liuhosi projetu PALOP sei apoiu nafatin Nasaun CPLP inklui TL kuaze millaun 26 hodi promove boa governasaun no talentu artista sira.

Alende ne’e, durante konferénsia loron rua, nia realsa Xefe  Estadu no Governu hosi Nasaun CPLP sira felisita TL, tanba konsege rezolve liña fronteira ho Austrália.

Cabo Verde sei lidera Prezidensia CPLP to’o 2020 hodi entrega fali ba Angola durante tinan rua. “Hotu hotu deside katak simeira CPLP tuir maiu sei hala’o iha Angolaʺ, tenik.

Konferénsia ba da-13 no enkontru ba Ministru Negosiu Estranjeiru no Kooperasaun  ba da-12 ne’e hodi dada interese Nasaun sira atu adere ba organizasaun ne’e iha futuru hanesan, Geórgia, Chile, Japaun, Británika no seluktán.

Membru ba CPLP mak Portugal, Brazil, Angola, Guiné-Bissau, Mozambique, São Tomé e Príncipe, Cabo Verde, Timor-Leste no Guiné Equatorial.

Jornalista: Agapito dos Santos | Editora: Rita Almeida