segunda-feira, 30 de julho de 2018

Xanana Rezigna, Taur Buka Ema Foun

PARTILHAR

DILI: Kandidatu Ministru Konselleiru Primeiru Ministru, Xanana Gusmão, haruka ona karta ba Primeiru Ministru, Taur Matan Ruak, hodi lakohi atu asume kargu iha Governu.

Ministru Estadu Prezidénsia Konsellu Ministru, Hermenegildo ‘Agio’ Pereira hateten, Xanana husu ona ba Primeiru Ministru atu nomeia fali ema seluk hodi troka ninia pozisaun iha governu laran.

Nia esplika, razaun Xanana rezigna-aan tanba iha ajenda seluk atu halo, liu-liu atu ativu liután iha asuntu fronteira marítima no asuntu sira ne'ebé relevante ba kestaun ne’e.

Mezmu la hola parte ba estrutura governu ne’e, maibé sei mantein nafatin fó ba bloku AMP. Ne’e duni, husu ba militante no apoiante AMP nian hodi kontinua unidu no sólidu atu garante estabilidade governativa VIII Governu to’o mandatu remata.

Eis-Primeiru Ministru, Xanana Gusmão, nia naran tama iha lista atu simu pose ba dahuluk iha primeiru tomadade-pose, maibé tanba halo solidáriu membru governu sira seluk ne’ebé pendente, Xanana mós rejeita atu simu pose.

Nune’e, iha segundu pose mós Prezidente Repúblika hasai dekretu ida atu fó nafatin pose ba nia no Sekretáriu Estadu Peska, Rogério de Araújo Mendonça, hamutuk ho Ministru Defeza, Filomeno Paixão.

Maski nune’e, Primeiru Ministru haruka karta ba Prezidente Repúblika atu fó de'it pose ba Ministru Defeza. Nune’e, membru governu na’in rua seluk sei adia tanba kestaun polítika.

Antes aprezenta programa ba Parlamentu Nasionál, Primeiru Ministru mós konvida ona Xanana Gusmão no kandidatu membru governu balun hodi partisipa iha reuniaun Konsellu Ministru.

Jacinto Xavier | Independente
PARTILHAR

Author: verified_user

Publicação luso-timorense sem fins lucrativos

0 comentários: