segunda-feira, 30 de julho de 2018

Implementasaun Polítika Desentralizasaun Prejudikadu Tanba Lei

PARTILHAR

DILI, (TATOLI) – Vise Ministru Administrasaun Estatal, Abílio José Caetano, hateten implementasaun Desentralizasaun Admninistrativa hakdasak, tanba lei sira hanesan Podér Lokál, Finansa Munisipál, Aprovizionamentu seidauk iha.

“Kompeténsia polítika ba implementasaun Desentralizasaun Administrativa ne’e la’ós iha Governu de’it, maibé presiza lei sira hanesan Lei Podér Lokál, Lei Finansas Munisipais, Lei Aprovizionamentu”, Abílio argumenta iha debate programa Governu Da-Ualu Konstitusionál ba loron datoluk nian iha Parlamentu Nasionál, sesta ne’e, bainhira hatan ba deputadu balun nia preokupasaun kona-ba progresu implementasaun polítika Desentralizasaun Administrativa.

Nia haktuir dezde 2003 to’o agora, Governu halo preparasaun ba polítika refere no esplika implementasaun polítika desentralizasaun sempre bazea ba buat rua maka Konstituisaun RDTL artigu 5,71, 72 no 156 no Planu Estratéjiku Dezenvolvimentu Nasionál (PEDN).

Governante ne’e hatutan PEDN Kapítulu IV haklaken desentralizasaun nia prinsípiu maka oinsá atu dezenvolve setór privadu, promove instituisaun-sira ne’ebé forte no lejítimu iha nasaun tomak ho estável nomós iha oportunidade partisipasaun demokrátika.

“Signifika katak atu atinje ida ne’e presiza iha eleisaun munsipál atu haforte eleisaun munisipál. Tanba ne’e maka iha PEDN iha tinan 2015 liu-ba nu-mínimu ita halo ona eleisaun iha munisípiu tolu to’o lima maibe en-felizmente ita la realiza, tanba seidauk prodús lei vítal ne’ebé temi iha leten”, tenik.

Tanba la konsege implementa, nia esklarese tinan 2016 kontinua polítika ida ne’e, maibé la liuhusi eleisaun munisipál tanba lei laiha, ne’e duni Governu halo esforsu hodi kontinua preparasaun maka iha Dekretu Lei Nú: 3/2016 ne’ebé alteradu ho Dekretu Lei Nú. 9/2018 iha ne’ebé mensiona katak preparasaun sei liuhusi Deskonsentrasaun Administrativa, katak, tau munisípiu hanesan administrasaun direta hosi Estadu.

Segunda faze, Abílio dehan Desentralizasaun Institusionál, hatúr munisípiu nu’udar administrasaun indireta hosi Estadu, no, terseira faze, Desentralizasaun Territoriál, iha ne’ebé hatúr munisípiu sira nu’udar Governu lokál ida ho nia Asembleia Munisipál.

Jornalista: Xisto Freitas | Editora: Rita Almeida
PARTILHAR

Author: verified_user

Publicação luso-timorense sem fins lucrativos

0 comentários: