AMP SEI ESKOLLA EMA SUBSTITUI XANANA | AGIO: DADA KADORAS MAI TL KOMPLEKSU

Lideransa másimu sira husi Koligasaun Aliansa Mudansa ba Progressu (AMP), sei eskolla ema atu substitui Kay Rala Xanana Gusmão husi Ministru Konselleiru no Ministru Planeamentu Investimentu Estratéjiku iha VIII Governu.

Ministru Estadu no Prezidénsia Konsellu Ministru, Agio Perreira, hateten, Prezidenti Koligasaun AMP, Kay Rala Xanana Gusmão, ses-an husi estrutura VIII Governu, tanba hakarak foka liu ba fronteira terrestre entre Timor Leste ho Indonézia, no Fronteira Marítima ho Australia.

Tanba tuir Agio Pereira, atu diskuti fronteira marítima ho Indonézia, tenki hakotu uluk lai fronteira tarrestres.

“Tanba ne’e, Maun Xanana, ho Maun Taur nu’udar Primeiru Ministru ho maun Naimori, sira sei ko’alia hodi haree oinsa mak atu la’o ba oin,”relata Agio Perreira ba jornalista sira iha Parlamentu Nasional (PN), Sesta (27/07).

Nia esklarese, Xanana hases-an husi estrutura Governu ne’e,  la’os tanba nia mak hakarak atu ses-an, husi Governu ida ne’e.

“Maibé nia haree hanesan sirkumstansias obriga nia para tenki hases-an, para nia konsetra totalmente 100% iha prosesu negosiasaun ne’ebé komplikadu lahalimar, negosiasaun ho Repúblika Indonesia atu konklui fronteira rai maran nian, tanba la konklui rai maran, atu hahú fronteiras marítimas ho Indonesia mós susar,” katak Agio.

Agio dehan, Governu mós sei fó apoiu 100% ba Kay Rala Xanana Gusmão nia servisu hodi konklui negosiasaun fronteira entre Indonesia ho Australia.

“Negosiasaun atu kadoras mai Be-Asu, Viqueque ne’e mós kompleksu tebes, tanba involve lei no téknika, maibé hot-hotu konkorda ona katak, tenki mai Timor Leste duni, maibé tenki operasionaliza polítika ne’e hodi bele iha susesu,”dehan Agio.cos

GMN TV | Grupo Média Nacional