Kompañia Lokál 10 Ezije Atu Selu Arrendamentu Direta Ba Estadu La’ós Ba Ensul

DILI, (TATOLI) – Empreza lokál 10 ne’ebé hala’o atividade negósiu iha aluger Ensul nian ezije ba Governu atu selu arrendamentu direta ba Estadu no la’ós ba empreza internasionál ne’e.

Portavós empreza 10, Cidalio Reis, hatete arrendamentu ne’e di’ak liu selu ba Estadu para osan ne’e bele sirkula iha rai-laran duké fó tiha ba ema, maibé laharee buat ida.

“Entaun ita fó osan ne’e sai hela de’it, agora ita-nia Governu iha planu atu proteje osan ne’e bele sirkula iha rai-laran, maibé pelu kontráriu hahalok ida ne’e la’o hela iha rai-laran”, Cidalio kestiona iha Kafé U’ut Páteo, ohin.

Hanesan timoroan ne’ebé foin aprende iha atividade emprezariál hatene bainhira osan ne’e sirkula iha país laran dezenvolvimentu bele la’o ho di’ak no kuandu osan sai mak barak entaun menus kampu traballu, menus atividade dezenvolvimentu iha Timór laran no ida ne’e susar boot bainhira atu hahú konstrusaun ba rai ne’e.

Emprezáriu sira ne’e preokupa ho arrendamentu ne’e no husu atu kompañia aprezenta legalidade, tanba tuir planu empreza internasionál ne’e atu halo investimentu, ezemplu hanesan Timor Plaza bainhira kompletu hotu mak foin bele fó aluga, maibé realidade halo ona.

“Ami haree katak fatin sira ne’e mamuk de’it, simentu sira ne’e ami rasik mak taka depois sira pinta de’it mak kalen, reboka no hadi’a balun no seluk ami mak halo entaun preokupasaun ba ami”, katak tan.

Nia afirma: “Se investidór internasionál ida mai ho kapasidade ne’ebé fó konfiansa ba ita-nia Governu hodi fó maizumenus tinan 50 aumenta tan 49 bele dehan tinan 99 ba nia  para investe, ami haree ida ne’e laiha benefísiu ba Estadu no povu ba aban-bainrua, karik nia utiliza kalen ne’e ou antigu edifísiu SAPT nia hodi buka moris, loke sepermerkadu, fa’an fali karreta iha ne’e depois moris filafali ho timoroan sira ho kustu ne’ebé boot, entaun buat ruma laloos, ami bolu ita-nia Governu para fó atensaun ida ne’e”.

Emprezáriu sira ne’ebé investe iha área kafé, restaurante, jináziu, roupa, tikete, ATK no seluk tan iha aluger ne’e kada fulan selu ba kompañia husi dólar 750 to’o 7.500, depende ba atividade ne’ebé halo. “Hanesan AC no buat seluk ami rasik nian depois taxa ne’e foti porsentu 10 husi ne’ebá ami selu direta ba Estadu”.

Nune’e preokupasaun mak hahú husi investimentu ne’ebé boot hanesan jináziu ne’ebé besik dólar rihun 300 ida resin ne’e retornu ida ne’ebé hein tempu naruk, maibé kondisaun latuir akordu ne’ebé halo.

“La’ós ba jináziu de’it, ami sente katak ita presiza tinan ida, rua foin bele hetan filafali ita-nia osan-inan ne’ebé hatama, ita foin bele hatene lukru ne’e depois tinan ida. Ami hare la estavel tanba kondisaun ne’ebé nia fó mai  buat balun ne’ebé kontra ona akordu ne’ebé Estadu fó ba nia, tanba ita haree bainhira nia investe ona mak nia bele fó aluga, agora seidauk halo investimentu nia fó aluga ona entaun sai preokupasaun, ami bele kontinua ka la’e se ami gasta lubuk ida hadi’a buat sira ne’e”, haktenik.

Tanba ne’e maka emprezáriu timoroan sira husu jestór para bele aprezenta nia legalidade tanba altura 2013 Ensul rasik bankarota ona iha Portugál.

“Preokupasaun tanba sá mak buat ne’e sei la’o se nia deklara bankarota ona, entaun oinsá Governu atu fiar ida ne’e se nia bankarota ona, investimentu bele la’o ka la’e? Mas agora la’o no realidade akontese fali hanesan ne’e”.

Hatutan durante tinan hirak nia laran investidór internasionál ida ne’e seidauk selu buat ida ba Estadu, tanba tuir akordu investimentu Estadu fó espesialidade balun ba investidór sira katak livre taxa.

“Ami hatene katak ida ne’e parese la’o hela entaun durante tinan 10 nia goza hela free taxsira ne’e nomós laselu arrendamentu hodi hetan uluk ona arrendamentu liuhusi supermerkadu, fa’an karreta nomós aluger sira”.

Porta vós ne’e ezije ba Governu bainhira modelu invenstimentu ida hanesan ne’e timoroan iha kapasidade atu halo no tanba sá tenke selu fali ba investór ida ne’ebé seidauk selu buat ida ba Estadu.

Ba kestaun ne’e empreza sanulu haruka ona karta ba Primeiru-Ministru, Ministériu Justisa, Sekretáriu Estadu Rai no Propriedade, no TradeInvest atu toma atensaun.

“Ita-nia Estadu hanesan Ministériu Justisa hatene ona katak kazu ida ne’e ami komesa levanta ona  nomós Ministériu Públiku ami haruka ona karta ba”.

Tuir Cidalio husi parte investimentu ne’e mak iha haree katak kontra fali objetivu ne’ebé sira halo, tanba ne’e nu’udar sidadaun sira kestiona maka’as kona-ba nia futuru investimentu refere.

Nia relata problema foufoun mosu kuaze empreza 10 ne’ebé aluga fatin ne’e halo ida-idak nia atividade negósiu, maibé bainira hahú kontratu no hamosu tiha ona dúvida iha akordu ho kompañia ne’ebé agora jere.

“Tanba iha 2010 ita-nia Governu anteriór aprova rezolusaun ida atu fó ba investidór Ensul atu halo investimentu sentru negósiu ida tuir planu ne’ebé sira aprezenta no akordu ne’e ladún asesu no segredu entre Governu no empreza”.

“Altura ne’ebá hotu-hotu dehan Ensul, maibé kuandu ami halo akordu ida ho sira tau de’it iha ne’ebá katak nu’udar jestór, maibé antes akordu ne’e ami ho fali kompañia Central Financeira Teria (CFT) nia iha Luxemburgu ne’ebá, rejista hela, entaun sai preokupasaun ba ami altura ne’ebá kedan tanba tuir loloos esplikasaun uitoan Ensul mai mak seluk, komu ami mós asina de’it tanba hakarak hala’o negósiu entaun avansa de’it, maibé to’o iha klaran ami sente katak ami mós investe maski montante ne’e uitoan ka barak, komesa mosu dúvida se ami kontinua hanesan laiha garante ida ba ami”.

Jornalista: Maria Auxiliadora | Editora: Rita Almeida

Imajen: Porta vós empreza sanulu, Cidalio Reis.