Prezidente Parlamentu Nasionál
(PPN), Arão Noe de Jesus Amaral, husu VIII Governu ne’ebé lídera husi Primeiru
Ministru, Taur Matan Ruak, atu aprezenta ona Orsamentu Jeral Estadu (OJE) ba
tinan 2019 iha loron 15, fulan oin Outubru, nu’udar tempu normal ba governasaun
sira atu aprezenta OJE.
“Husu VIII Governu, OJE ba 2019
nian hein katak, 15 de Outubru ne’e tenke aprezenta mai Parlamentu ona, atu
nune’e para ita hala’o ona prosesu debate, audiénsia, no debate iha
jeneralidade no espesialidade, ita bele kalkulu antes Dezembru OJE 2019 bele
aprova ona iha final global, atu promulga ka la’e ne’e kabe ba Prezidente
Repúblika,”hateten PPN Arão Noe ba jornalista, Kuarta (12/09/2018).
Líder másimu segundu órgaun
soberanu ne’e afirma tan, antes periodu Natal no Tinan foun, tenke aprova ona
OJE 2019 iha Parlamentu hanesan periodu normal sira iha governasaun anterior
nian, atu nune’e labele akonetese hodi fó impaktu ba mákina estadu no povu nia
moris hanesan tinan 2018 nian.
“Ami hakarak OJE ba 2019 molok
tama periodu natal Orsamentu tenke hotu ona, normalmente Orsamentu Jeral Estadu
ne’e Governu aprezenta mai iha 15 de Outubru kada tinan, maibe tinan ida liuba
ne’e la akontese, tanba ne’e mak nia impaktu ita sente dadauk ne’e, para atu
labele akontese tan ma kami dehan ho karakter urjensia ne’e,” dehan Arão Noe.
Enkuantu, Orsamentu Jeral Estadu
ba tinan 2018, aprova ona iha Parlamentu nasionál iha loron 7, fulan Setembru
ne’e, no haruka ona ba Prezidente Repúblika Francisco Guterres ‘Lú Olo’, iha
Segunda loron 10, fulan Setembru lorokraik ne’e, atu promulga ka veta iha durasaun
loron 30 nia laran. Say
GMN TV | Grupo Média Nacional
Sem comentários:
Enviar um comentário