OPERASAUN KOK HAMOSU VIOLASAUN DH

DILI-Baseia ba rejultadu monitorizasaun husi Provedoria Direitus Humanu no Justisa (PDHJ) ba operasaun Komando Operasaun Konjunta (KOK), katak mosu duni violasaun direitus humanu iha komunidade nia let.

Tuir Provedor PDHJ Silverio Pinto Baptista katak, rejultadu monitoring husi PDHJ hahu husi (21/3/2015) operasaun konjunta too iha 16 Abril 2015 mosu duni violasaun direitu humanus.

Iha loron 11 Marsu 2015 PNTL halo tratamentu at ba ema ho inisial AM, TSM no CCB durante iha prosesu kapturasaun. Ema sira hetan baku, tuku no tebe husi membru PNTL balun to ran sai PNTL la lori ema sira nee ba halo tratamentu mediku. Iha 2 Abril 2015 KOK tiru ema nain 2 ho inisial AF ense mina ba motor mak hetan tiru no NM tuir informasaun neebe maka PDHJ hetan katak razaun tiru nee tamba deit ema nain 2 nee halai motor makas  iha Baucau Villa. Iha 7 Abril 2015 KOK halo tratamentu at ba maun alin nain 2 ho inisial DC no ADC. Ema nain 2 nee KOK baku tuku tebe no lori kilat fai iha hirus matan. Ema nain 2 nee la hetan tratamentu mediku. Iha 8 Abril 2015 KOK tiru ema nain 1 ho inisial MDC, ema nee baixa iha Hospital Referal Baucau to agora PDHJ seidauk bele intervista vítima tamba la autoriza husi KOK ho razaun iha prosesu investigasaun nia laran,” dehan nia liu husi konferensia imprensa iha salaun PDHJ, Caikoli, Sesta (17/04/2015).

Husi rejultadu monitorizasaun nee halo PDHJ konklui katak iha duni violasaun direitus humanus ho tipu violasaun direitu ba moris, baseia ba konstituisaun RDTL artigu 29 no sub kategoria ameasa oho. Direitu ba liberdade, seguransa no integridade ema ida-idak nian basia ba konstituisaun RDTL artigu 30 no sub kategoria tortura ka tratamentu kruel, laos umanu no degradante (TAKLU). Informasaun kompletu iha STL Jornal no STL Web, edisaun Sabado (18/4/2015). Domingas Gomes/Lusiana Ximenes

Suara Timor Lorosae