Enkontru Parseiru Dezenvolvimentu, TLDPM tenke dezenvolve estratejia ekonomiku

DILI - Enkontru Parseiru Dezenvolvimentu Timor Leste (TLDPM) ne’ebé foin loke iha sabadu (06/06) iha Sentru Konvensaun Dili laiha partisipasaun husi ministeriu kompetente. Fatin sorumutu ho parseiru sira husi nasaun amigo parseiru tasibalu ne’e, kadeira barak mak mamuk. TLDPM ne’e hetan atensaun seriu liu husi sosiedade sivil, tanba tuir sira nia observasaun forum TLDPM ne’e tinan-tinan hala’o maibe la hatudu rezultadu ne’ebé klaru ba povu Timor-Leste.

Liu husi Forum ONG Timor Leste, sosiedade sivil husu ba Governu TL no parseiru dezenvolvimentu  atu bele dezenvolve Estratéjia Ekonómiku ida ba Timor-Leste  atu nune’e bele hadia kualidade moris povu Timor Leste nian. “Ho oportunidade ida ne’e, ami hakarak foka sai ami nia rekomendasaun atu bele dezenvolve estratéjia ekonómiku ida ba Timor-Leste, ne’ebé ho maka’as ami husu ba Parseiru Dezenvolvimentu, hamutuk ho Governu Timor-Leste, atu suporta hodi bele hadi’ak kualidade moris ba povu Timor-Leste tomak, ohin no aban-bainrua nian,” dehan Reprezentante Sosiadade Sivil Ines Martins hato’o lia hirak ne’e iha enkontru parseiru dezenvolvimentu Timor Leste ne’ebe halao iha Centru Convensaun Dili (CDD) Sabadu (06/06) semana ne’e.

Nia dehan sosiedade sivíl sira iha Timor-Leste, FONGTIL apresia ba esforsu hosi Parseiru Dezenvolvimentu sira ne’ebé kontinua fó suporta ba nasaun ida ne’e, no sosiadade sivil espera katak tulun sira ne’e bele ajuda duni povu Timor-Leste. Durante ne’e tuir nia katak Parseiru Dezenvolvimentu barak mak konkorda ho sosiadade sivil nia observasaun no rekomendasaun sira katak dalan dezenvolvimentu ohin loron nian ne’e la sustentável. Infelizmente, normálmente rona ida ne’e iha konversa privadu ka lee iha  parseiru no Governu sira nia dokumentu internal nian, duke rona ka hare iha  Parseiru ho Governu sira nia deklarasaun iha públiku. 

“Ami enkoraja ita-boot sira atu lalika subar realidade moris ne’ebé ita-boot sira hare no hatene kona-ba diresaun polítika Timor-Leste nian, maibé sai nakloke no barani liu tan, hodi nune’e bele ajuda ami nia na’i-ulun sira atu bele responde ba ami nia preokupasaun no rekomendasaun sira. Timor-Leste enfrenta dezafiu barak atu bele hasees-an hosi dependensia ba esportasaun petróleu ne’ebé limitadu tebes, no ami presiza tulun hotu atu enfrenta dezafiu ida ne’e,”  katak nia .

Nia afirma katak Banku Mundial no Ministériu Finansas nia relatóriu konjunta kona ba Public Expenditure Review: Infrastructure ne’ebé publika iha fulan Marsu liuba, esplika katak Moras Olanda hamenus kresimentu ekonomia ba tempu naruk nian  maioria kona-ba kresimentu ekonomia ne’ebé hetan bele esplika hodi hasa’e despeza no investimentu Governu nian. Ho investimentu setór privadu nian ne’ebé la’o neineik tanba kresimentu iha setór sira ne’ebé la direitamente depende ba despeza governu nian maibé depende ba dezenvolvimentu infrastrutura sira ne’ebé eziste ona atu halo produsaun sei nafatin ki’ik. Dezde 2007, setór agrikultura nia produsaun totál tun ona. 

Maski relatóriu ida ne’e la ko’alia direitamente ka espesífiku hanesan esbosu anterior sira, sosiadade sivil hare katak hanoin ida ne’e hanesan mós ho preokupasaun sira ne’ebé organizasaun sosiedade sivíl sira foti dezde tinan hirak liu ba. Bainhira Timor-Leste failla atu dezenvolve nia ekonomia lokál ida ne’ebé bele prodús sasán sira ne’ebé bele kompete ho sasán importasaun nian, no mós fakar povu nia osan barak hodi investe ba projetu sira ne’ebé folin karun, kualidade fraku, no hare ba sei la fornese retornu ne’ebé signifikante.

Buat sira ne’e akontese tanba Timor-Leste prefere liu atu sadere nia moris ba rendimentu rentista  hosi mina-rai no gas, evita nesesidade atu hetan rendimentu alternativu ka la kuidadu hodi jere povu nia osan ho kuidadu. Impaktu ida ne’ebé boot liu hosi malisan rekursu  ida ne’e sei kona Timor-Leste maizumenus 2026, tinan lima hafoin kampu mina-rai Bayu-Undan, ne’ebé nia produsaun másimu nian iha 2012 ne’e sai maran tiha. “Sosiadade sivil komprende katak dala barak Governu lakohi atu hare ita-boot sira nia relatóriu sira ne’ebé foka sai duvida ka sujere mudansa ba iha sira nia desizaun, maibé ida ne’e la signifika katak ita boot sira atu labele hateten loloos no halo sensura ba realidade ne’ebé Timor-Leste enfrenta hela,” kestiona nia.

Tan ne’e sira  enkoraja Governu atu publika dokumentu sira ho pontualidade, loos no kompletu, Maski sosiadade sivil kontente katak Transparency Portal foin lalais ne’e hahú fali, maibé  ONG triste katak Governu prevene atu publika IMF nia relatóriu Article IV tinan kotuk, no mós Konta Nasional hosi 2013 seidauk publika no Governu hasai kategoria ‘time comparisons’ hosi Labor Force Survey. “Ami espera katak relatóriu sensu no Living Standards Survey sei publika ho lalais, kompletu no loos, atu fornese evidénsia hodi ajuda Governu atu bele halo polítika ida ne’ebé matenek no foo rezultadu di’ak,” katak nia.

Rendimentu mina no gas tun

Iha biban ne’e mos sira hateten katak Povu Timor-Leste moris iha nasaun ida, entre nasaun sira seluk ne’ebé depende maka’as ba esportasaun petróleu iha mundu. Iha 2014, 73% reseita estadu nian ne’e mai hosi fan petróleu no gas, no 20% seluk mai hosi retornu investimentu Fundu petrolíferu nian. Infelizmente Timor-Leste pasa ona nia rendimentu no produsaun másimu iha 2012. Durante 2014, Timor-Leste nia rendimentu hosi petróleu menus 40% kompara ho rendimentu ne’ebé TL hetan iha 2013, tanba rezerva petróleu no gas hosi kampu Bayu-Undan no Kitan hahú mihis ona no tanba presu mina-rai ne’ebé tun.

To’ ohin loron, liu 74% hosi rezerva kampu rua ne’e TL supa hotu ona, tanba tuir   Gráfika sira hatudu produsaun no reseita ida ne’ebé tun maka’as dezde 2012, no liña pontilhada verde hosi 2015 hatudu sai projeksaun reseita nian ne’ebé fahe hosi Ministériu Finansas iha sira nia workshop ba Jornadas Orcamentais iha semana rua liubá. Nia mos afirma tan katak daudauk ne’e, Governu halo esforsu ida ne’ebé maka’as atu harii infrastrutura petróleu nian iha kosta súl Timor-Leste nian ho esperansa katak indústria petróleu iha rai maran Timor-Leste nian ne’e bele sei estimula dezenvolvimentu kampu servisu no ekonomia nian.

Kada tinan, Orsamentu Jerál Estadu nian tinan-tinan aloka ona osan tokon barak ba projetu ida ne’e, no mós sei foti rai produtivu komunidade nian ba agrikultura nian. Maski nune’e, atu kompleta komponente sira hosi projetu ambisiozu ida ne’e, ita sei presiza investimentu osan billaun barak tan, no hare ba nia benefísiu la justifika nia kustu, risku no impaktu sosiu-ambiental nian. Timor-Leste dezeñu projetu Tasi Mane ida ne’e bazeia ba espetasaun katak petróleu no gas natural hosi kampu Greater Sunrise nian ne’ebé nia prosesamentu sei halo iha rai maran Timor-Leste nian.

Infelizmente, kompañia ho Governu Timor-Leste seidauk iha konkordansa oinsá atu dezenvolve kampu ne’e, no Australia lakohi atu diskute fronteira maritime ida ne’ebé permanente, nune’e kampu ne’e la hahú produsaun molok Fundu Petróliferu maran ona. Timor-Leste labele sadere nia ami nia futuru ba posibilidade deskobrimentu foun ba kampu mina-rai seluk, no Greater Sunrise, maski depois disputa ne’e rezolve ona, ne’ebé sei la fornese reseita natoon atu finansia ita nia rai doben ida ne’e, ne’ebé sei la’o hakat hela no dezenve hela. iha dékada ida oin mai, nasaun ida ne’e sei bele hasoru krize finansiál ida ne’ebé TL labele evita ona, sei la iha osan atu selu ba servisu báziku hanesan edukasaun, polísia, saúde, bee moos no estrada sira.

Ukun na’in sira, espesialmente sira ne’ebé servisu iha setór petróleu, fila-fila hateten katak kampu mina-rai rua ne’e sei la maran no hein hela atu hetan tan rezerva foun, maibé ita labele nega realidade ida ne’e ita hasoru hela. Timor-Leste iha ona urjénsia atu buka fontes servisu, ekonomia no rendimentu ida liu hosi husi dezenvolve setór ekonomia produtivu naun petróleu hanesan agrikultura, turizmu no indústria ki’ik. Nune’e, husi ohin ba oin, ita presiza duni mudansa ida ne'ebé radikál liu iha diresaun nasaun ne’e nian hodi prepara an atu ba hasoru tempu oin mai ne’ebé sei laiha rendimentu mina-rai.

Osan Mina-rai la to’o

Hosi 2003 to ohin loron, Timor-Leste konverte ona nia riku soin billaun $20 ne’ebé TL gasta ona billaun $6, no billaun ida tan sei gasta iha tinan 2015 nia rohan. Aleinde ne’e mós, TL hetan liu tokon $2.7 durante tinan sanulu hosi investimentu Fundu Petroleu iha ekidade no obligasaun internasional nian. Iha Marsu 2015 nia rohan, TL nia Fundu Petrolíferu nia saldu hamutuk billaun $16.82 kompara ho saldu billaun $16.58 iha Setembru 2014 nian ne’e aumentu de’it 1.4%, hodi hatudu ba TL katak ita labele ona atu depende ba investimentu Fundu Petrolíferu no reseita hosi kampu Bayu-Undan no Kitan nian.

Durante tinan hitu kotuk ne’e, Timor-Leste gasta ona billaun $6.6, ne’ebé billaun $5.7 ne’e finansia hosi Fundu Petróliferu. Maski eskalasaun orsamentu ne’ebé lalais hosi 2007-2012 la’o neineik, maibé despeza ne’ebé ezekuta durante 2014 sa’e 28% kompara ho tinan 2013, no despeza rekurrente nian sa’e 26%. Karik projetu sira ne’ebé dezeñu ona ka la’o hela daudauk ne’e implementa duni, orsamentu sei sa’e maka’as iha tinan sira oin mai, no ida ne’e sei sai at liu tan bainhira TL selu nia tusan. Karik gastu estadu ida ne’e nafatin la’o tuir lala’ok orsamentál nian ohin loron, Fundu petrolíferu sei automatikamente tun maka’as iha 2017, maski TL bele hetan kresimentu double digit ba rendimentu doméstiku anuál nian no Fundu ne’e sei hotu duni lalais tinan lima hafoin produsaun hosi Bayu-Undan remata iha 2020.

Maski ikus mai Greater Sunrise bele fó osan, provavelmente entre billaun $15-$20 durante tinan 20, maibé ida ne’e sei la natoon atu finansia Timor-Leste nia orsamentu estadu. Ita nia populasaun ne’ebé aumenta maka’as, ne’ebé sei presiza estadu atu gasta osan barak tan ba fornesimentu servisu sira ne’ebé ho kualidade di’ak. Aleinde ne’e, sei gasta osan barak tan mós atu funsiona no halo manutensaun ba infrastrutura fíziku sira ne’ebé TL harii ona. Iha fulan kotuk, Ministériu Finansas halo sira nia Jornadas Orçamentais atu deside envelope fiskál ba 2016 hamutuk ho billaun $1.3. Sosiadade Sivil apresia tebes ba pasu di’ak ida atu hamenus despeza estadu nian, maske ida ne’e sei difisil atu implementa lahó halo desizaun polítiku ida ne’ebé difisil mos. 

“Ami espera katak Parseiru Dezenvolvimentu sira bele ajuda Governu hodi hadi’ak liu tan jestaun finanseiru públiku nian atu nune’e, despeza estadu nian iha futuru bele efikás liu tan no mós tau valor ba despeza ne’ebé ita halo. Ami mós espera katak osan sira ne’ebé bele poupa tan liu hosi kansela tiha proposta projetu sira ne’ebé hafoin halo analiza ba kustu, benefísiu, risku no estudu viabilidade nian ne’ebé objetivu no kompletu, ne’ebé hetan katak laiha razaun ka la realistiku atu implementa, hodi nune’e bele aloka fali osan, rekursu umanus no espasu polítika ba programa ne’ebé fó rezultadu sira ne’ebé sustentável, ekitavel no realistiku mai ami nia populasaun,” dehan Ines. (BT)

Business Timor - Pedro