SEGURANSA SIVIL XANANA DUNI MEMBRU PN – GOVERNU HUSU DESKULPA

Membru Parlamentu Nasional (PN) lamenta ho atetude seguransa sivil nain tolu (3) Ministru Planeamentu Investimentu Estratejiku (MPIE), Kay Rala Xanana Gusmão ne’ebe duni deputada Albina Marçal Freitas ho deputada Olinda Morais, wainhira atu hasoru eis Primeiru Ministru (PM), Kay Rala Xanana Gusmao.

Akontesimentu ne’e akontese iha loron 1 Julho semana kotuk ne’e membru PN konsidera seguranasa sivil halao knar la ho profesional.

“Iha semana 2 liu ba Hau hakarak ba atu fo netik husu klarifikasaun informasaun ruma ba tragedia Caiwaca (Lospalos-Red) ne’ebe mak Hau nia laen mate ho komisaria politiku Maubelis hamutuk ho sira nia soldadu nain 9. Tanba ne’e mak Hau atu ba hasoru atu fo netik informasaun ruma ba ida ne’e. Maibe hau ba seguransa ne’ebe mak halo seguransa ne’e duni Hau hanesan labarik kikoan,”lamenta deputada Albina Marcal Freitas relata iha plenaria Tersa (7/7) iha PN.

Nia parte preokupa ho hahalok seguransa sivil ne’e ema ne’ebe mak persiza atu hasoru eis komandante guerilheiru Kay Rala Xananan Gusmao ne’e susar la hanesan iha tempu luta ne’ebe ema hotu fasil hasoru nia (Xananan).

“Uluk ita nia maun Xanana ema povu kbit laek mak fo seguransa mak nia moris to’o ohin loron. Maibe agora dadauk maun Xanana hanesan fali osan mean, osan mean sei diak fali ita bele ba iha fat-fatin ita bele sosa, maromak mos ita ba Igreja ita sei bele haree Maromak nia lalatak e Maromak nia letratu, maibe ita bele dehan maun Xanana ninia espiritu mos ita la hetan,”afirma deputada Albina.

Konaba kestaun ne’e deputada Jacinta Abu Cau Pereira husi bankada Partidu Demokratiku (PD) preokupa mos ho atetudi seguransa sivil ne’ebe duni membru PN sira ne’e.

“Hau lamenta teb-tebes hahalok sira hanesan ne’e, tanba buat hotu ne’ebe mak oras ne’e ita senti saida mak ita goza ida ne’e mos liu husi kontribuisaun bot ida ne’ebe mak ema hotu kontribui to’o ohin loron ita hotu goza. Laos haree hanesan pesoal deputada nain 2 mas ita haree hanesan veterana ka ita haree ba hanesan buat ne’ebe mak sira atu hato’o iha momentu ne’eba ne’e,”sekunda deputada Abu Cau.

Governu Husu Deskulpa

Ba atetude ne’ebe refere Governu liu husi Sekertariu Estado Asuntu Parlamentar (SEAP), Maria Terezinha Viegas husu deskulpa ba membru PN ne’e.

“Ba prekupasaun e lamentavel ami husu deskulpa dala ida tan plenaria ne’e ba atuasaun ka atetudi husi seguransa sivil ninia hahalok ne’ebe mak akontese ba distinta deputada nain 2 iha semana kotuk liu ba iha dia 1 de Julho, ami lamenta hahalok ne’e,”

SEAP informa mos katak, hahalok refere hato’o ona ba Ministeriu Interior (MI) para bele fo atensaun ba asuntu refere.

“Ami informa tiha ona ba iha Sr. Ministru no mos Ministru interior e defeza atu bele hola atensaun ba iha atetude sira ne’e. tanba defaktu distinta deputada nain 2 ba ho kareta parlamentu ninian (MP),”dehan nia.bal

Jornal Nacional